Banka Kombëtare e Kroacisë njoftoi se borxhi publik shënoi një rekord të ri përgjatë 12 muajve të fundit duke u rritur me 13.6 për qind për shkak të recesionit të vazhdueshëm në vend.
Banka Kombëtare e Kroacisë deklaroi në të dhëna të publikuara të hënën se borxhi i qeverisë ka arritur në gati 30 miliardë euro në qershor 2014 ndërsa ekonomia e vendit po përballet me vitin e gjashtë të recesionit.
Dhoma e Ekonomisë së Kroacisë, HGK, tha se kjo do të thotë se borxhi i qeverisë është rritur me 3.58 miliardë euro ose 13.6 për qind, brenda vetëm një viti.
Gjatë periudhës 12 mujore para qershorit 2014, borxhi ndaj kreditorëve të huaj u rrit me 16.6 për qind ndërsa ai ndaj kreditorëve vendës u rrit me 12 për qind.
“Nevoja për të financuar deficitin e lartë buxhetor dhe për të rifinancuar borxhet e faturuara ka sjellë rritje të shpejtë të borxhit të qeverisë qendrore si ndaj kreditorëve vendës ashtu edhe ndaj të huajve,” thuhet në analizën e HGK.
HGK tha se borxhi publik është rritur që nga viti 2009 dhe është bërë i paqëndrueshëm. Në fund të vitit 2008 borxhi publik qe vetëm 13.5 miliardë euro.
Kritikët e autoriteteve kroate thonë se qeveritë e njëpasnjëshme kanë dështuar në vendosjen e reformave të rrepta të tregut dhe kanë vijuar të rrisin shpenzimet publike.
“Shpenzimet janë të stërmëdha dhe askush nuk ka stomak për t’i ulur ato. Çdo vit ne shpenzojmë 20 miliardë kuna (2.62 miliardë euro) më shumë nga sa fitojmë. Ne po ecim me forcë në drejtimin e gabuar,” deklaroi Ante Babic nga Qendra për Zhvillim Ndërkkombëtar, një institut kërkimor për Reuters më herët këtë muaj.
Sipas Eurostat, borxhi publik i Kroacisë u rrit në më shumë se 68 për qind të PBB-së në tremujorin e parë të vitit 2014.
Përfaqësuesi i ri i Bankës Botërore në Kroaci, Carlos Pinerua i tha agjencisë së lajmeve Bloomberg javën e kaluar se niveli i borxhit e bën vendin të dobët përballë tronditjeve të mundshme të huaja.
“Kroacia në gjendjen e saj aktuale mund të mbahet për ca kohë, por jo për shumë gjatë,” tha Pinerua.
Me një borxh të jashtëm prej 54 miliardë eurosh, ky është vendi me borxhin më të lartë në ish Jugosllavi.
Sllovenia ka borxh të jashtëm prej 42 miliardë eurosh, Serbia 26 miliardë, Maqedonia 5.5 miliardë, Bosnja dhe Herzegovina 3.9 miliardë dhe Mali i Zi, 1.6 miliardë euro borxhe.
