Pasi presidenti i Rusisë Vladimir Putin konfirmoi vizitën e tij të pritshme në Serbi për përvjetorin e çlirimit të Beogradit më 1944, udhëheqësi i Serbisë tha se vendi do ta presë atë me një paradë ushtarake “të tillë sa nuk është parë prej vitesh”.
Rusia konfirmoi të martën se Presidenti Vladimir Putin do të vizitojë Beogradin më 16 tetor me ftesë të presidentit të Serbisë Tomislav Nikolic.
“Presidenti i Rusisë do të marrë pjesë në festimet për 70 vjetorin e çlirimit të Beogradit nga pushtimi Nazist. Bisedimet me Tomislav Nikolic dhe bisedat me kryeministrin Aleksandar Vucic do të përqendrohen në çështjet kyçe të bashkëpunimit dypalësh, më së shumti mbi tregtinë dhe ekonominë,” deklaroi zyra e Putinit.
Vucic dhe ambasadori i Rusisë në Serbi Alexander Chepurin, u takuan më herët për të diskutuar programin e vizitës.
Pas takimit, Vucic njoftoi se Serbia do të përgatisë një paradë ushtarake madhështore për të përkujtuar përvjetorin e çlirimit të Beogradit në fund të Luftës së Dytë Botërore.
“Presidenti Putin do të marrë pjesë gjithashtu në paradën ushtarake, një ngjarje që ne nuk e kemi përgatitur në 40 vjet dhe unë besoj se kjo datë dhe ky rast e meriton atë,” tha Vucic në një konferencë për shtyp të enjten.
Kryeministri i Serbisë deklaroi se gjatë vizitës së Putinit, të dy palët do të diskutojnë marrëdhëniet e së ardhmes mes dy aleatëve historikë.
“Jam i bindur se në të ardhmen ne mund të bëjmë shumë gjëra sëbashku të cilat do të jenë në interes të të dyja vendeve,” tha Vucic.
Më herët në shtator, Michael Kirby, ambasadori i SHBA-së në Serbi, shprehu shqetësimin e tij mbi vizitën e Putinit, duke thënë se ai nuk e dinte se pse Putini po e vizitonte Beogradin.
