Autoritetet e Greqisë, Italisë dhe Shqipërisë po përpiqen t’i shkojnë në ndihmë tragetit “Norman Atlantik”, i cili është përfshirë nga flakët jashtë brigjeve të Shqipërisë pranë Vlorës.
Qindra pasagjerë u bllokuan në një traget që udhëtonte nga Italia për në Greqi pasi në anije ra zjarri, bëhet e ditur nga agjencia Reuters. Sipas ministrisë së Punëve të Jashtme të Shqipërisë, në bord gjenden së paku edhe 22 nënshtetas shqiptarë.
“Në traget ndodhen edhe 22 shtetas me pasaportë shqiptare, por numri mund të jetë edhe më i lartë si rezultat i mbajtjes së dyshtetësisë nga shtetasit tanë”, bëri të ditur ministria e Punëve të Jashtme në një deklaratë për shtyp.
Anijet e ndihmës italiane dhe greke luftuan me detin e trazuar dhe erën mbi 90 kilometra në orë për t’u afruar me tragetin në vështirësi. Kushtet shumë të këqija të motit vështirësuan përpjekjet për të ndihmuar pasagjerët e bllokuar.
Deri në orën 14 të ditës së sotme, rojet bregdetare greke arritën të evakuojnë 150 pasagjerë, nga mbi 500 që gjendeshin në traget.
Vijon…
