Rënia e euros në tregun ndërkombëtar përballë monedhës amerikane duket se po merr me vete edhe lekun shqiptar, i cili po dobësohet vazhdimisht.
Leku shqiptar shënoi një rekord negativ shumëvjeçar ndaj dollarit amerikan gjatë ditës së sotme kur u këmbye mesatarisht në kuotën 118.1 lekë për USD, bëhet e ditur nga kursi mesatar fiks i publikuar nga Banka e Shqipërisë. Ky është niveli më i lartë i dollarit amerikan kundrejt lekut që nga shtatori i vitit 2003, tregojnë statistikat historike të BSH.
Dobësimi i shpejtë i lekut ndaj dollarit duket se reflekton rënien e euros përballë dollarit në tregun ndërkombëtar. Euro u këmbye sot në bursë për 1.1842 dollarë, niveli më i ulët në 9 vjet e gjysmë, njoftoi agjencia Reuters.
Euro ka rënë në bursë si pasojë e pritshmërisë së investitorëve që Banka Qendrore Europiane të ndërmarrë masa ekstreme për të luftuar krizën ekonomike më vonë këtë muaj, përfshirë blerjen e një pjese të borxheve sovrane të vendeve me borxhe të larta të eurozonës duke përdorur një politikë të njohur si “Lehtësim Sasior”, që është ekuivalenti i printimit të parasë në kohën kur shumica e parasë është faktikisht një impuls elektronik.
Kundrejt Euros leku ka mbetur përgjithësisht i pandryshuar në kuotën 140 lekë për euro. Banka e Shqipërisë përdor një “shportë” monedhash për të ndjekur ecurinë e lekut përballë monedhave kryesore të marra sëbashku. Kjo shportë përbëhet në masën 80 për qind nga euro dhe 20 për qind nga dollari. Pavarësisht se leku nuk është luhatur përballë euros, rënia përballë dollarit ka bërë që të humbasë afro 2 për qind të vlerës përballë shportës gjatë vitit të fundit, rënie e shkaktuar nga forcimi i dollarit me 14 për qind.
Forcimi i dollarit kundrejt lekut pritet të ketë pasoja në çmimet e disa mallrave të importuara të cilat blihen me dollarë, si karburantet apo një pjesë e drithërave. Për karburantet, psh, ndonëse çmimi i tyre ka rënë me 50 për qind gjatë muajve të fundit në tregun ndërkombëtar, në Shqipëri rënia ka qenë shumë më e kufizuar për shkak të taksave fikse që rëndojnë gjysmën e çmimit final të naftës apo benzinës si dhe dobësimit të lekut përballë monedhës me të cilën nafta paguhet.
