Në lidhje me mosmarrëveshjen e fundit mbi kufijtë, presidenti malazez ka refuzuar të caktojë një ambasador të ri në Bosnje, ndërsa Bosnja po peshon kundërmasa të reja.
Partitë opozitare malazeze të mërkurën i bënë thirrje qeverisë të përballojë më ashpër një mosmarrëveshje të re të kufirit që u krijua pasi disa akademikë boshnjakë pretenduan se një shtrirje e shkurtër e gjirit malazez i përkiste me të drejtë Bosnjës.
Ata kanë kërkuar gjithashtu një seancë dëgjimore urgjente në parlament me ministrin e jashtëm, Igor Luksic. “Asnjë centimetër e territorit malazez nuk duhet të cedohet nga askush,” tha lideri i bllokut opozitar malazez ‘Positiv’, Darko Pajovic, ditën e mërkurë.
Kjo mosmarrëveshje kufiri nuk është e re dhe daton pas në kohë kur të dyja vendet ishin republika në Jugosllavi.
Megjithatë, çështja është rigjallëruar në muajt e fundit pasi disa intelektualë boshnjak dhe OJQ-të prezantuan dokumente, që sipas tyre provonin se zona e Sutorinës i ka përkitur Bosnjës deri para Luftës së Dytë Botërore.
Të premten e shkuar, presidenti malazez Filip Vujanovic refuzoi caktimin e një ambasadori të ri në Sarajevë për shkak të mosmarrëveshjes.
Ai i kujtoi medias që Bosnja ka njohur pavarësinë e Malit të Zi në 2006 brenda kufijve ekzistues.
Ndërkohë, presidenca boshnjake besohet se po merr masa të ngjashme, ndoshta edhe kthimin në atdhe të ambasadorit në Podgoricë, ndonëse asnjë zyrtar nuk e ka konfirmuar këtë.
Zëvendës presidenti serb i Dhomës së Përfaqësuesve, një nga dy dhomat e parlamentit boshnjak, Mladen Bosic, të mërkurën tha se çështja duhet të zgjidhet me qetësi. “Jam i befasuar nga reagimi i Malit të Zi,” tha ai, duke iu referuar presidentit.
Komisioni kushtetues-ligjor i parlamentit boshnjak është ngarkuar me detyrën e organizimit të një debati publik mbi kufirin. Bosic tha se ai i ka shkruar kryetarit të asamblesë së entitetit Republika Srpska për t’u përfshirë në çështje.
Kjo sepse lidhet direkt me territorin që më parë i përkiste komunës Trebinje, që shtrihet brenda Republika Srpska.
Zona për të cilën bëhet debati është 75 km katrorë dhe përfshin pesë fshatra dhe lumin Sutorina. Nëse i kthehet Bosnjes, do t’i jepte kësaj një pikë të dytë hyrje në detin Adriatik.
Mali i Zi dhe Bosnja kanë nënshkruar një marrëveshje për kufirin pas gjashtë vitesh negociata, në nëntor 2014. Sipas saj kufijtë e shteteve të krijuara pas ndarjes së Jugosllavisë duhet të ndjekin kufijtë e republikave të mëparshme jugosllave.