Ministri i tregtisë me jashtë i Bosnjës, ka hequr dorë, duke përmendur presionin për të lejuar shitjen e municioneve te Ukraina, ndonëse disa shohin të tjerë faktorë si shkaktarë.
Ministri boshnjak i tregtisë me jashtë dhe ministër i marrëdhënieve ekonomike, Boris Tucic, tha të enjten se kishte dhënë dorëheqjen, duke përmendur presionin në rritje për të lejuar shitjen e municioneve boshnjake në Ukrainë.
“Arsyeja kryesore për dorëheqjen time ishte se nuk jam dakord me disa akte të institucioneve të caktuara të Bosnjës dhe Hercegovinës, që janë përfshirë në lëshimin e lejeve për eksportim të armëve dhe pajisjeve ushtarake, që llogarisin vetëm pjesërisht rregullimet ligjore në Bosnje dhe Hercegovinë dhe detyrimet ndërkombëtare, duke rrezikuar marrëdhëniet me disa nga partnerët dhe investitorët tanë më të rëndësishëm,” tha Tucic.
Milorad Dodik, president i Republika Srpska dhe president i partisë më të madhe serbe – Aleanca e Social Demokratëve të Pavarur, SNSD, anëtar i së cilës ishte Tucic, tha se e mbështeste vendimin tij për të dhënë dorëheqjen. ‘Mendoj se dorëheqja është morale dhe jam plotësisht i solidarizuar me të,” tha ai.
Media serbe e Bosnjës gjithashtu citoi që Dodik të ketë thënë se ai më parë i kishte kërkuar presidencës boshnjake që të ndalojë shitjet e municioneve në Ukrainë, duke shtuar se ishte kundër interesave rusë, por nuk pati reagim për këtë nga presidenca.
Shumë serbë mbështesin lidhjet me Rusinë, – një vend mik ortodoks – dhe konflikti në Ukrainë midis qeverisë pro-perëndimore të Kievit dhe separatistëve pro-rusë në lindje i ka vënë në pozitë të sikletshme.
Dodik dhe qeveria e tij në entitetin kryesisht serb në Bosnje ka kultivuar marrëdhënie me Rusinë dhe Dodik ishte një nga pak politikanët kudo në botë që e ka uruar personalisht presidentin rus Vladimir Putin për aneksimin e Krimesë nga Ukraina.
Disa analistë thonë se dorëheqja e Tucic ka pak të bëjë me efektet e vërteta meqë mandati i qeverisë aktuale është duke mbaruar dhe qeveria e re do të formohet së shpejti.
Ata shtojnë se kjo ka të bëjë më shumë me manovrat që partitë po bëjnë si pjesë e negociatave në formimin e qeverive të reja, pas zgjedhjeve të përgjithshme të tetorit të shkuar.
Almir Terzic, gazetar nga Sarajeva, tha për Balkan Insight se dorëheqja e Tucic nuk ka të bëjë shumë me marrëdhëniet e Republika Srpska me Rusinë sesa me faktin se Dodik dhe SNSD po përpiqen të fitojnë vende në qeverinë e shtetit.
Në këtë moment, koalicioni drejtues në parlamentin shtetëor e përjashton SNSD dhe përbëhet nga dy partitë më të mëdha boshnjake – Partia e Veprimit Demokratik, SDA, dhe Fronti Demokratikt DF – partia më e fortë kroate, Bashkimi Demokratik Kroat – HDZ dhe blloku i partive opozitare serbe të udhëhequra nga Partia Demokratike Serbe, SDS.
“SNSD po përpiqet në mënyra të ndryshme të sigurohet që të jetë pjesë e Këshillit të Ministrave,” tha Terzic.
Ai tha se SNSD do të donte të merrte ministrinë e jashtme dhe ministrinë e financës në qeverinë e re, në mënyrë që të kontrollojë zhvillimet financiare prej përkeqësimit të situatës ekonomike dhe sociale në entitet.
Terzic tha gjithashtu se SNSD është përpjekur të vonojë krijimin e qeverisë së re në mënyrë që të tregojë se nuk mund të funksionojë mirë pa të.