Ambasada amerikane ka shprehur zhgënjimin e saj pasi Mali i Zi nuk ia doli të mbështesë planet për të burgosur malazezët që përfshihen në luftërat e huaja.
Ambasadorja amerikane në Podgoricë, Margaret Ann Uyehara, vlerësoi të hënën përpjekjet e Malit të Zi për të frenuar ekstremistët e dhunshëm por nxiti deputetët të shpejtonin ndryshimet në Kodin Penal, për të ndëshkuar pjesëmarrjen në betejat e huaja.
Ajo tha se ishte e zhgënjyer që parlamenti kishte dështuar në mbështetjen e një projektligji për këtë çështje, duke thënë se pavarësisht se ‘Mali i Zi është i vogël, ka vend për shqetësim”.
“I bëj thirrje deputetëve ta miratojnë në seancën tjetër”, tha Uyehara duke shtuar se ajo nuk mund ta shprehte sesa e rëndësishme ishte të miratoheshin rregullime të tilla.
Javën e shkuar, parlamenti refuzoi të mbështeste një mocion për të kriminalizuar malazezët që merrnin pjesë në konflikte të armatosura jashtë vendit.
Pasi disa myslimanë malazezë u raportuan se luftojë në Siri, qeveria propozoi ndryshimin e Kodit Penal duke parashikuar se kushdo që merr pjesë në stërvitjen paraushtarake apo të organizatave terroriste, si dhe në konfliktet ushtarake jashtë vendit, duhet të ndëshkohet me pesë vite burg.
Opozita dhe partitë e pakicave e votuan kundër, pasi qeveria kërkoi një votim të përbashkët në një paketë ndryshimesh për Kodin Penal, disa prej të cilave lidheshin me dënimin me burg për mospagim taksash.
Të dhënat e fundit e nxjerra nga Agjencia Kombëtare për Sigurinë në tetor 2014 thoshin se 13 shtetas malazezë kishin shkuar të luftonin së bashku me forcat myslimane në Siri.
Dhjetë prej tyre janë kthyer, njëri është vrarë dhe dy të tjerë janë ende në fushëbetejë. Në dhjetor, Raportuesi i Parlamentit Europian për Malin e Zi, Charles Tannock, pretendoi se agjencitë malazeze të sigurisë po monitoronin mbi 300 perona të dyshuar për lidhje terroriste.
Qeveria e mohoi këtë, megjithatë, tha se agjencitë e inteligjencës po monitoronin një numër jo të konsiderueshëm.
Myslimanët përbëjnë rreth 19 për qind të popullatës në Malin e Zi. Shumica prej tyre janë boshnjakë dhe shqiptarë etnikë. Deri më tani, luftimi në konfliktet e shteteve të huaj nuk është konsideruar shkelje penale prej ligjit malazez.