Një monitorim i disa prej mediave online më të ndjekura në Shqipëri ka zbuluar se diskriminimi dhe gjuha e urrejtjes prek më së shumti grupet e margjinalizuara dhe se redaksitë nuk bëjnë asgjë për ta ndaluar.
Një raport i monitorimit të gjuhës diskriminuese dhe të urrejtjes në median online ka zbuluar se kjo problematikë haset në 67.7 për qind të rasteve ndaj grupeve shoqërore dhe në 32.3 për qind ndaj individëve të caktuar.
Monitorimi i kryer nga ProLGBT dhe redaksia e “Historia ime” gjatë muajve tetor dhe nëntor 2015, përfshiu 750 artikuj dhe 120 komente të lexuesve në portalet online si GazetaTemA, Balkanweb, Panorama, Newsbomb.al, Syri.net, Dita dhe Shqiptarja.com.
Qëllimi i këtij projekti të mbështetur nga Civil Rights Defenders ka qenë vlerësimi i etikës në median shqiptare dhe diagnostifikimi i problematikës së gjuhës së urrejtjes dhe diskriminimit në median shqiptare.
Në analizë janë marrë përmbajtja e tekstit, por edhe elementë të multimedias, si video dhe foto.
Nga monitorimi u evidentuan 86 artikuj të gjuhës së urrejtjes direkte ose indirekte ndërsa në 123 artikuj ka pasur gjuhë diskriminuese direkte ose indirekte. Ndër individët e diskriminuar 59 për qind kanë qenë gra dhe 41 për qind burra.
Raporti tregon se bindjet politike, përkatësia gjinore, orientimi seksual ose identiteti gjinor, raca dhe përkatësia fetare janë bazat mbi të cilat mbështetet më së tepërmi diskriminimi dhe gjuha e urrejtjes në median online në Shqipëri.
“Situata në median shqiptare në aspektin e përdorimit të gjuhës së urrejtjes dhe asaj diskriminuese është shumë e rëndë,” tha për BIRN, Kristi Pinderi kryetari i organizatës ProLGBT.
“Përgjegjësia e redaksive për të ndaluar gjuhën e urrejtjes duhet të dalë më shumë në pah dhe të dallohet nga liria e shprehjes. Ky problem mund të zgjidhet përmes vetërregullimit të medias pa pasur nevojën e një nisme ligjore,” shtoi ai.
Raporti nënvijëzon faktin se në shumicën e rasteve artikujt diskriminues ose ato të urrejtjes botohen pa emër ose me iniciale. Rezulton se 82 për qind e artikujve me gjuhë diskriminuese dhe urrejtje janë vënë nën emrin e redaksive dhe 18 për qind e këtyre artikujve kanë si autor emra konkretë gazetarësh apo analistësh.
Sipas Pinderit, moscilësimi i emrit të gazetarit në artikujt e shkruar mban vulën e pranimit të këtij diskriminimi nga vetë redaksitë.
“Përdorimi i gjuhës diskriminuese dhe të urrejtjes nuk i sjell asnjë të mirë shoqërisë shqiptare, por dëmton edhe më tej grupet e magjinalizuara që hasen me këtë fenomen”, përfundoi ai.
Gjuha diskriminuese dhe e urrejtjes ka qenë në 55 për qind të rasteve e drejtuar në mënyrë direkte, ndërsa në 45 për qind të rasteve ajo ka qenë e nënkuptuar dhe indirekt (përmes fotove, videos shoqëruese, titujve apo nëntitujve).
Keni bërë të mërzitshëm një shkrim që mund të ishte shumë interesant. Statistikat pa një ilustrim apo citim. Asnjë kërkesë për koment nga kryeredaktorët e portaleve. Nëse fenomeni është aq i përhapur një pjesë e mirë e publikut as që e vë re që është gjuhë urrejtjeje apo diskrimininuese.