Gjykata e Tiranës ka vendosur “pezullim nga detyra” për Haki Çakon dhe “arrest shtëpie me mbikqyrje elektronike” për drejtorin e Forcës Operacionale dhe vartësin e tij, pasi akuzohen se kanë shkelur ligjin me pajisjen “IMSI Catcher”.
Haki Çako, drejtor i Përgjithshëm i Policisë së Shtetit ndodhej në një panair në bulevardin kryesor të Tiranës, kur u njoftua se ishte pezulluar nga detyra nga një vendim gjykate. Çako u filmua nga kamerat teksa shkëmbeu dy-tre fjalë me disa deputetë të Partisë Socialiste dhe u largua në mënyrë të papritur nga aktiviteti, pasi hipi në sediljen e pasme të një makine me xhama të zinj.
Thuajse në të njëjtën kohë, Prokuroria e Përgjithshme lajmëroi përmes një njoftimi për shtyp se Gjykata e Tiranës e pezulloi Çakon, pasi akuzohet se ka shpërdoruar detyrën gjatë administrimit të pajisjes së përgjimit “IMSI Catcher”.
Ekzistenca e pajisjes “IMSI Catcher” u kthye në çështjen kryesore të debatit publik pak javë më parë, kur opozita akuzoi ministrin e Brendshëm dhe Policinë e Shtetit se po kryenin përgjime të paligjshme. Ministri Tahiri dhe kreu i Policisë, Haki Çako u mbrojtën me argumentin se kjo pajisje i përkiste misionit italian të Interforcës dhe se kishte ardhur në Shqipëri në bazë të një marrëveshjeje të 2007-s për qëllime trajnimi.
Megjithatë, Prokuroria vazhdoi hetimet dhe arriti të siguronte në gjykatë tre masa sigurie për zyrtarë të lartë të Policisë së Shtetit. Bashkë me Çakon, gjykata vendosi masën e arrestit shtëpiak për drejtorin e Forcës Operacionale, Artion Duka dhe vartësin e tij specialist, Entiol Xhelilaj.
Dy oficerët Duka dhe Xhelilaj akuzohen se kanë shpërdoruar detyrën dhe kanë kryer veprime që pengojnë zbulimin e së vërtetës, ndërkohë që “arrestin shtëpiak” duhet ta kryejnë me mikqyrje elektronike.
Sipas njoftimit për shtyp të Prokurorisë së Përgjitshme, tre punonjësit e policisë akuzohen se kanë lejuar aktivitet të paligjshëm përgjimi, me veprimet apo mosveprimet e tyre.
Në njoftimin e saj, Prokuroria argumenton se pajisja “IMSI Catcher” hyri në mënyrë të paligjshme në Shqipëri, pa marrë autorizimin e Prokurorit të Përgjithshëm, qëndroi në ambientet e Forcës Operacionale dhe se ka dyshime të arsyeshme sipas saj, që është përdorur për përgjime.
Prokuroria pretendon se në të paktën dy raste, makina ku ishte instaluar pajisja “IMSI Catcher” ishte lëvizur nga specialisti i Forcave Operacionale, Entiol Xhelilaj, pa asnjë urdhër me shkrim apo tagër ligjor.
Sipas njoftimit të Prokurorisë, Çako nuk ka marrë masat që i takojnë me ligj për të siguruar hyrjen, administrimin dhe përforimin e pajisjes “IMSI Catcher”.
“Kjo pajisje ka hyrë në territorin e vendit tonë pa iu nënshtruar regjimit doganor të përkohshëm dhe, për më tepër, pa marrë autorizimin përkatës nga Prokurori i Përgjithshëm, si autoriteti i vetëm që jep lejen për përdorimin e mjeteve të tilla,” thuhet në njoftimin e Prokurorisë.
Sipas Prokurorisë, pajisja ka pasur aftësinë për të identifikuar numrat IMEI të telefonëve celularë dhe se hetimi ka zbuluar se telefonë të ndryshëm mund të kenë qenë nën administrimin e paligjshëm të pajisjes.
Më 13 maj 2016, Prokuroria ka nxjerrë urdhrin e sekuestrimit të pajisjes, që dyshohej se gjendej në ambientet e drejtorisë së Përgjithshme të Policisë. Ajo pretendon se oficerët e policisë gjyqësore janë penguar të ekzekutojnë këtë urdhër, pasi Entiol Xhelilaj ka larguar që aty makinën me pajisjen e përgjimit.
“Prokuroria dyshon se për anëtarët e Policisë së Shtetit dhe pjestarët e grupit trajnues ka ndodhur diçka thelbësore, pasi automjeti në periudhën para kësaj date rrinte shumicën dërrmuese të kohës brenda ambjenteve të F.P.O. dhe pas kësaj date ka dalë për të mos u kthyer më. Ka dyshime që hapësira kohore prej gjysëm ore ka shërbyer për të bërë të pamundur sekuestrimin e aparatit,” thotë njoftimi i Prokurorisë.
Drejtori i Forcës Operacionale, Artion Duka akuzohet nga Prokuroria se nuk ka marrë masa për administrimin e pajisjes dhe se lëvizja e saj, dy herë nga vartësi i tij, Xhelilaj e ngarkon atë me përgjegjësi, sipas Prokurorisë.
Prokuroria thotë se Duka ka marrë përsipër se gjatë përdorimit të aparatit “IMSI Catcher” nuk është kryer asnjë veprim i kundraligjshëm, por hetuesit thonë se ka dyshime të arsyeshme se kjo nuk është e vërtetë.
Pas vendimit të Gjykatës së Tiranës, Prokuroria e Tiranës deklaroi se po vijon hetimet për këtë çështje, për të provuar nëse zyrtarë të tjerë të lartë mund të jenë përfshirë në “veprimtarinë e dyshuar si të paligjshme të përgjimeve”.
