Një copë e vogël bizhuterie, e zbuluar në një zonë pre-historike në Bullgarinë jugore, është artefakti më i vjetër në botë, pretendojnë arkeologët.
Një copë bizhuterie katër-milimetra zbuluar në fshatin bullgar Yunatsite pranë qytetit Pazardzhik daton në vitin 4500-4600 para erës sonë, thanë për median arkeologët bullgarë.
Ata pretendojnë se ari i zbuluar është rreth 200 vjet më i vjetër se bizhuteritë e gjetura në varrezë të Epokës së Bakrit në qytetin Varna pranë Detit të Zi në Bullgari, të njohura si ari më i vjetër i përpunuar, zbuluar në vitin 1972.
“Nuk kam dyshim se është më e vjetër se ari në Varna,” tha profesori i asociuar Yavor Boyadzhiev, pranë Akademisë Bullgare të Shkencave.
“Është një zbulim shumë i rëndësishëm. Është një copë e vogël ari, por mjaftueshëm e madhe për të gjetur vendin e vet në histori”, shtoi Boyadzhiev.
Arkeologët besojnë se copa e bizhuterisë është prodhuar në këtë zonë, në periferi të Pazardzhik, që Boyadzhiev thotë se ishte vendbanimi i parë “urban” në Europë, i populluar nga “një shoqëri shumë e kulturuar”, që u zhvendos aty nga Anatolia, në Turqinë e sotme, rreth vitit 6000 para erës sonë.
Copa peshon vetëm 15 centigramë dhe u gjet në rrënojat e një shtëpie të vogël që mund të ketë ekzistuar që prej përdorimit për herë të parë të metaleve si bakri dhe ari.
Sipas Boyadzhiev, kjo copë e rëndësishme e historisë botërore do të shfaqet në muzeun historik në Pazardzhik sapo të jetë analizuar dhe t’i jetë konfirmuar vjetërsia.
Ky është i dyti zbulim i rëndësishëm arkeologjik në Ballkan në vetëm një javë.
Më herët, arkeologët serbë gjetën pllaka ari dhe argjendi në Viminacium, zonë e një qyteti romak dhe fortesën legjionare në Serbinë lindore, që u raportuan se datojnë nga shekulli 4.
Një tjetër zbulim i rëndësishëm në Viminacium ndodhi më pak se një muaj më parë, në fund të korrikut, kur varri i një familje të klasës së lartë u zbulua.
Varri iu shtua 14,000 varreve tashmë të zbuluar në Viminacium – numri më i madh i varreve të gërrmuar në territorin e ish-Perandorisë Romake.
