Qeveria e Kosovës do t’i japë 219,000 euro ndihmë anëtarëve të familjeve të shqiptarëve etnikë të dënuar për terrorizëm apo të vrarë gjatë shkëmbimit dy ditor të zjarrit me policinë në Kumanovë, Maqedoni, në vitin 2015.
Në një takim të premten, qeveria e Kosovës tha se do të jepte 219,000 euro për të mbuluar shpenzimet e anëtarëve të familjeve të personave të dënuar për përfshirje ose të vrarë gjatë shkëmbimit dy ditor të zjarrit në Kumanovë, Maqedoni, në maj të vitit 2015.
“Dyqind e nëntëmbëdhjetë mijë euro janë ndarë për të mbuluar shpenzimet e familjeve të të dënuarve dhe personave të vrarë në rastin e Kumanovës. Secilës familje do t’i jepen 10, 000 euro nga rezervat e buxhetit të shtetit,” tha kryeministri i Kosovës Ramush Haradinaj.
Ministri i Financave Bedri Hamza kërkoi informacione për llogaritë bankare të familjeve, duke thënë se shpërndarja e parave nuk do të ishte një problem.
Gjykata Penale e Shkupit më 2 nëntor dha dënime me burgim të përjetshëm për shtatë nga 37 të pandehurit shqiptarë etnikë të akuzuar për përfshirje në shkëmbimin dy ditor të zjarrit me policinë në Kumanovë, ndërsa shumica e të tjerëve morën dënime të gjata me burg.
Trembëdhjetë persona u dënuan me nga 40 vjet burg, gjashtë me nga 20 vjetësh, një me 18 vjet, dy me 14 vjet, dy me 13 vjet dhe dy u dënuan me nga 12 vjet burg. Katër nga 37 të pandehurit u liruan nga akuzat.
Të pandehurit u shpallën fajtorë për terrorizëm, për pjesëmarrje ose dhënie ndihme në shkëmbimin dy ditor të zjarrit me forcat e sigurisë në Maqedoni, ku mbetën të vrarë 18 persona, përfshirë tetë policë, në qytet.
Shumë nga 37 të pandehurit janë me origjinë nga Kosova dhe janë ish-anëtarë të Ushtrisë Çlirimtare të Kosovës.
Në Kosovë pati protesta kundër dënimeve, ndërsa Haradinaj i bëri thirrje për konsultime ambasadorit të Kosovës në Shkup.
“Një hetim ndërkombëtar do të ndihmonte në zbulimin e të vërtetës,” tha Haradinaj.
