Komisioni ad hoc i shoqërisë civile, i ngritur për të zgjedhur një anëtar të Këshillit të Lartë të Prokurorisë, deklaroi të martën se kriteret e caktuara në ligj e kanë bërë të pamundur përzgjedhjen e kandidaturave.
“Përsa i takon përzgjedhjes së anëtarit për Këshillin e Lartë të Prokurorisë nga shoqëria civile, Komisioni Ad Hoc i Shoqërisë Civile është gjendur në pamundësi reale për t’i përcjellë Kuvendit listën me së paku 3 kandidatë për anëtar të shoqërisë civile, të cilët përmbushin kriteret e caktuara ligjore,” tha Komisioni në njoftim për shtyp.
Komisioni shpjegoi se nga muaji shkurt deri në muajin tetor, me propozim të këtij komisioni nga Kuvendi i Shqipërisë janë hapur dhe njoftuar 5 thirrje publike për kandidatët që shprehin interesin për të qenë anëtarë të “KLP” si përfaqësues të shoqërisë civile. Bazuar në këto thirrje, 10 nga 11 kandidaturat e mbërritura janë skualifikuar për shkak se nuk përmbushin kriteret formale ligjore.
Sipas Komisionit arsyet për skualifikimin e kandidatëve kanë qenë mospasja nga kandidatët e një eksperience pune 15-vjeçare si jurist, mungesa e të provuarit me fakte dhe prova konkrete të angazhimit të këtyre kandidatëve në shoqërinë civile, mungesa e një profili të spikatur shoqëror, integriteti të lartë moral apo justifikimi i aseteve.
Komisioni nënvizoi se procedura ka qenë e dokumentuar, ndërkohë deklaroi se gjatë kësaj periudhe është përballur me katër procese gjyqësore të iniciuara nga kandidatët e skualifikuar për KLP, raste për të cilat Gjykata ka lënë në fuqi vendimarrjen e Komisionit të Shoqërisë Civile.
“Komisioni vlerëson se kriteri i vendosur për 15 vite përvojë pune në profesion si jurist ka qenë një ndër faktorët kyç që ka prodhuar situatën aktuale me kandidaturat për KLP të ardhura nga shoqëria civile,” shkruhet në deklaratë.
“Komisioni gjen rastin të shprehë dhe njëherë angazhimin e tij maksimal në zbatimin e reformës në drejtësi dhe konstituimin e organeve të reja të qeverisjes së sistemit gjyqësor,” përfundoi Komisioni.
