Prokuroria e Tiranës dërgoi në gjykatë dosjen e ish-kryetarit të Bashkisë së Kavajës për falsifikimin e formularit të dekriminalizimit, vepër penale kjo që dënohet nga 6 muaj deri në 4 vjet burg.
Prokuroria e Tiranës njoftoi të enjten se dërgoi për gjykim ish-kryetarin e bashkisë së Kavajës, Elvis Rroshi, i cili akuzohet për falsifikimin e formularit të dekriminalizimit. Sipas njoftimit për shtyp të Prokurorisë së Tiranës, Rroshi akuzohet për veprën penale të “falsifikimit të vulave, stampave apo formularëve,”, për të cilën Kodi Penal parashikon dënim nga 6 muaj deri në 4 vjet burg.
Procedimi penal ndaj Rroshit u regjistrua në qershor 2016, kur sektori i Dekriminalizimit në Prokurorinë e Përgjithshme provoi se ish-kryebashkiaku kishte përdorur disa emra në të shkuarën e tij si dhe rezultonte i arrestuar, i ndaluar ose i dëbuar nga shtete si Italia, Zvicra dhe Gjermania. Në formularin e dekriminalizimit, Rroshi kishte deklaruar vetëm një ndalim në Mynih të Gjermanisë.
“Subjekti i ligjit në fjalë, ka fshehur përdorimin e disa emrave në të shkuarën e tij të arrestimeve, ndalimeve, dënimeve, dëbimeve, masave të ndryshme sigurie dhe shtrënguese në Itali, Zvicër dhe Gjermani, falsifikim dokumentash, shqiptare dhe të huaja,” thuhet në njoftimin e Prokurorisë.
Prokuroria provoi se Rroshi nuk kishte deklaruar dënimin e dhënë nga autoritetet italiane të drejtësisë për veprën penale të përdhunimit, të kryer në vitin 1995 në Campobasso, duke pasqyruar të dhëna të rreme në rubrikën 1 të formularit të vetëdeklarimit.
Prokuroria nënvizoi gjithashtu që ai kishte fshehur faktin se ishte dëbuar nga shteti zviceran në vitin 1993 dhe nga ai italian në vitin 1995, duke pasqyruar të dhëna të rreme në rubrikën 7 të formularit.
Në hetimin e saj, Prokuroria ka zbuluar gjithashtu se Rroshi është arrestuar në gusht të vitit 1997 në Zvicër, me urdhër të Gjykatës së Shtetit të Zyrihut dhe është dëbuar për herë të dytë, duke paqyruar të dhëna të rreme në rubrikat 5 dhe 7 të formularit.
Përveç të shkuarës së errët në vendet e BE-së, që nuk reflektohej në formularin e dekriminalizimit të Rroshit, Prokuroria dyshoi se ish-kryetari i Bashkisë së Kavajës kishte qenë nën hetimin e agjencisë amerikane DEA, nën emrin Enver Rroshi. Sipas Prokurorisë, DEA kishte informuar autoritetet zvicerane se po hetonin shtetasin Enver Rroshi për trafik droge dhe pastrim parash në vitin 2015, verifikime të cilat vazhdojnë.
