Maqedonia së shpejti do të ndryshojë ligjin e saj të kufizuar për abortin, i cili shkaktoi kritika nga aktivistët e të drejtave të njeriut, kur u miratua pesë vjet më parë, tha ministri i shëndetësisë.
Ligji i ri mbi abortin, drafti i të cilit është pothuajse i plotë, do të vërë theksin në të drejtën e grave për të zgjedhur, premtoi ministri i shëndetësisë Venko Filipce.
Ligji do t’i lejojë gratë të zgjedhin që të kenë abort deri në javën e 12-të të shtatzënisë, pas konsultimit me gjinekologun e tyre.
Nga java e 12-të deri në javën e 22-të të shtatzënisë, procedura do të jetë disi ndryshe dhe gratë do të duhet të kërkojnë mendimin e një komisioni të përbërë nga gjinekologë dhe obstetër.
“Risia këtu, e cila nuk përfshihet në dispozitat aktuale, është se brenda kësaj periudhe ne po vëmë të parat dëshirat e grave,” u tha Filipce të enjten gazetarëve.
Në rastin e një aborti pas javës së 22-të, në komision do të përfshihen gjithashtu ekspertë kardiologë dhe neokirurgë.
Filipce tha se zyrtarët tashmë e kanë hartuar ligjin e ri i cili aktualisht po kalon konsultimet përfundimtare me ekspertë mjekësorë dhe OJQ të të drejtave të njeriut, pas së cilës do të dërgohet në parlament për votim.
Ligji aktual, i cili u miratua në vitin 2013 me nismën e partisë konservatore VMRO DPMNE – pavarësisht protestave në rrugë nga aktivistët e të drejtave të njeriut – nuk e ndaloi plotësisht abortin në Maqedoni.
Por ai e bëri procedurën akoma më të vështirë duke përfshirë, ndër të tjera, edhe një kërkesë të detyrueshme me shkrim për një abort, e cila mund të refuzohet, si dhe një periudhë tre-ditore në të cilën gruaja që kërkon procedurën duhet të rimendohet nëse ajo me të vërtetë dëshiron një abort apo jo.
Ai gjithashtu përfshiu këshillim të detyrueshëm për gratë që dëshirojnë të kenë një abort.
Shumë aktivistë dhe mjekë këmbëngulën megjithatë se këto procedura thjesht e komplikuan procesin dhe i traumatizuan gratë.
Qeveria e mëparshme nisi gjithashtu një fushatë të quajtur “Zgjidh jetën” për të promovuar ndalimin e abortit.
Me zgjedhjen e qeverisë së re të udhëhequr nga social demokratët në maj të vitit të kaluar, aktivistët shpresuan se kufizimet do të hiqeshin.
Një koalicion i OJQ-ve të të drejtave të njeriut, Platforma për Barazi Gjinore, i bëri thirrje administratës së re në tetor të vitit të kaluar që të ndajë më shumë para për edukimin seksual dhe për të rritur ndërgjegjësimin për metodat kontraceptive moderne.
Venko Filipce u emërua ministër i shëndetësisë në dhjetor.
