Vendet e Ballkanit ranë dakord të krijojnë një bazë të përbashkët të dhënash dhe të zhvillojnë bashkëpunim në një përpjekje për të trajtuar krizën e vazhdueshme të emigrantëve dhe refugjatëve dhe të parandalojnë një tjetër fluks të madh njerëzish që i drejtohen Europës Perëndimore.
Ministrat e Sigurisë dhe të të Drejtave të Njeriut nga Ballkani dhe vendet fqinjë ranë dakord në një takim në Sarajevë të enjten për të krijuar një bazë të dhënash që do të jetë në përputhje me sistemet e ngjashme në Europë për të gjurmuar emigrantët.
“Ne duhet të jemi në gjendje të shohim nëse këta njerëz (emigrantë) kanë qëndruar më parë në Europë,” tha ministri boshnjak i sigurisë, Dragan Mektiç, për mediat pas takimit.
“Ne doo të shohim nëse është e mundur që ne nga Ballkani Perëndimor të bëhemi pjesë e FRONTEX-it (Agjencia Europiane e Kufirit dhe e Rojës Bregdetare),” shtoi ai.
Mektiç shpjegoi se marrëveshjet e ripranimit të emigrantëve midis vendeve duhet të respektohen dhe tha se ishte e rëndësishme të forcoheshin shërbimet shtetërore si policia kufitare.
“Ne duhet të mendojmë edhe për rikthimin e përbashkët të emigrantëve në vendet e treta ose vendet e origjinës, në mënyrë që çdo shtet të forcojë shërbimin kufitar dhe rojet,” tha ai.
Në takim morën pjesë përfaqësues të shumicës së vendeve të të ashtuquajturës Rrugë Ballkanike – Bosnja, Kroacia, Serbia, Mali i Zi, Shqipëria, Greqia, Austria dhe Sllovenia.
Takimi përbëhej nga dy panele, njëri kushtuar sigurisë dhe tjetri kushtuar aspekteve humanitare të krizës.
Ministri boshnjak i refugjatëve dhe personave të zhvendosur Semiha Borovaç tha për mediat se Bosnja ka arritur t’i përgjigjet në mënyrë adekuate fluksit të fundit të emigrantëve që hyjnë në vend.
“Prioritet është krijimi i kapaciteteve akomoduese. Ne kemi treguar se emigrantët mund të marrin të gjithë ndihmën e nevojshme,” tha Borovçi.
Bostjan Sefiç, sekretar i shtetit në ministrinë e brendshme të Sllovenisë, u tha mediave se që nga nëntori i vitit 2017, numri i emigrantëve të paligjshëm është rritur vazhdimisht.
“Situata është nën kontroll, por është koha që aktivitetet e përbashkëta të sigurojnë që çdo gjë të jetë nën kontroll. Trendi është negativ dhe duhet t’i qasemi menjëherë realizimit të masave konkrete të mbrojtjes,” tha Sefiç.
Ai u shpreh se nuk do të ishte mirë nëse anëtarët e BE-së janë të detyruar të miratojnë masa të njëanshme dhe për këtë arsye ishte e rëndësishme që vendet në rajon të bashkëpunojnë për të siguruar stabilitet.
Bosnja është përballur me një krizë emigrantësh që arriti kulmin në fund të majit pasi u regjistruan pothuajse 5,000 hyrje të paligjshme që nga fillimi i vitit.
Organizata Ndërkombëtare për Emigracionin, agjencia e emigrimit e OKB-së, gjithashtu paralajmëroi më 1 qershor se fluksi e emigrantëve në Ballkanin Perëndimor është ende në rritje.
Nga janari deri në fund të majit, autoritetet në Bosnje dhe Hercegovinë, Mal të Zi dhe Shqipëri regjistruan më shumë se 6,700 emigrantë të rinj dhe azilkërkues, një rritje më shumë se dyfish e 2,600 emigrantëve dhe azilkërkuesve të regjistruar në të tre vendet gjatë të gjithë vitit 2017.
