Komiteti Parlamentar për Stabilizim-Asociimin nxiti thellimin e reformës në drejtësi si dhe bëri thirrje për konsensus në realizimin e reformës zgjedhore. Shqipërisë i kërkohet të luftojë korrupsionin në nivelet e larta.
I mbledhur në Bruksel më 15 tetor, Komiteti Parlamentar për Stabilizim-Asociimin i bëri thirrje Shqipërisë që të konsolidojë më tej reformën në drejtësi si dhe të arrijë konsensusin për reformën elektorale, me qëllim implementimin në kohë të rekomandimeve të OSBE/ODIHR-it.
Dokumenti i miratuar thekson gjithashtu që korrupsioni mbetet një shqetësim madhor për Shqipërinë. Ndërsa vlerësohen përmirësimet e kuadrit ligjor dhe institucional në drejtim të lufës kundër korrupsionit, Komiteti kërkon përpjekje shtesë për rezultate të prekshme.
“…Fuqizimi i mëtejshëm i hetimeve proaktive, procedime dhe dënime përfundimtare në luftën kundër korrupsionit dhe krimit të organizuar, përfshirë nivelet e larta, duhet të mbetet një objektiv vendimtar për Shqipërinë…,” thuhet në dokument.
“Zyrtarët e rangut të lartë nuk duhet të përfitojnë trajtim të ndryshëm nga qytetarët e zakonshëm,” shtohet aty.
Dokumenti i Komitetit të përbërë nga deputetë të Parlamentit Europian dhe të Parlamentit të Shqipërisë përmban 17 rekomandime, të cilat përbëjnë edhe detyrat e shtëpisë së vendit në rrugëtimin e mëtejshëm drejt Bashkimit Europian.
Ky komitet bashkëdrejtohet nga Monica Macovei nga Parlamenti Europian dhe Taulant Balla nga parlamenti i Shqipërisë, prania e të cilit u kundërshtua nga përfaqësuesit e Partisë Demokratike në Bruksel.
Ndërsa përsërit mbështetjen e plotë të hapjes së negociatave me Shqipërinë në qershor 2019, Komiteti nxit Shqipërinë që të konsolidojë reformat dhe të ruajë momentumin pozitiv të tyre. Në këtë drejtim, Komiteti nënvizoi vazhdimin dhe konsolidimin e rezultateve konkrete dhe të pakthyeshme të reformës në drejtësi, ndërkohë që bëri thirrje për plotësimin e Gjykatës së Lartë dhe asaj Kushtetuese si dhe ngritjen e institucioneve të reja, të tilla si Këshilli i Lartë Gjyqësor dhe Këshilli i Lartë i Prokurorisë apo të Strukturës Speciale kundër Korrupsionit dhe Krimit të Organizuar, SPAK.
Sa i përket procesit specifik të vetingut, Komiteti Parlamentar i Stabilizim-Asociimit inkurajoi autoritetet shqiptare që të vazhdojnë bashkëpunimin e mirë me Operacionin Ndërkombëtar të Monitorimit si dhe i bëri thirrje autoriteteve në ekzekutiv dhe në parlament që të financojnë me burimet e duhura institucionet e vetingut.
Përveç vazhdimit të reformës në drejtësi, Komiteti e vë theksin tek nevoja e reformës zgjedhore në Shqipëri si dhe arritja e një konsensusi në Komisionin Parlamentar ad hoc për adoptimin e ndryshimeve në frymën e rekomandimeve të OSBE/ODIHR.
Çështjet ku kërkohen ndërhyrje lidhen me pavarësinë dhe depolitizimin e Komisionit Qendror të Zgjedhjeve, transparencën e financimeve të fushatës, regjistrimin e votuesve apo fenomeni i shit-blerjes së votave.
“Kujtojmë se adoptimi i reformave është jetësor për besimin publik në procesin elektoral dhe se zgjedhjet e lira dhe të ndershme janë një element thelbësor i procesit të anëtarësimit të Shqipërisë,” thuhet në raport.
Kultivimi i kanabisit dhe trafiku i lëndëve narkotike trajtohen në rekomandimin me nr.10, ku kërkohet forcimi i mëtejshëm i masave kundër trafikimit të të gjitha llojeve të drogërave.
Çështja e pronave dhe klima e biznesit zënë gjithashtu vend në dokumentin e miratuar më 15 tetor nga Komiteti Parlamentar për Stabilizim-Asocimin. Autoriteteve shqiptare u bëhet thirrje që të zbatojnë vendimin e Gjykatës Kushtetuese për ligjin e kthimit dhe të kompensimit të pronave dhe të tregojnë rezultate të përmirësuara në këtë çështje.
Ndërkohë që Shqipëria inkurajohet që të vazhdojë në rrugën e reformave të ndërmarra në fushën e përmirësimit të klimës së biznesit, autoriteteve shqiptare u bëhet thirrje që “të vlerësojnë siç duhet investimet publike si dhe të forcojnë mbikqyrjen e Partneritetit Publik Privat”.
Shqipërisë i bëhet gjithashtu thirrje që të respektojë të drejtat e njeriut, të drejtat e minoriteteve si dhe të garantojë lirinë e shprehjes dhe të mediave.
