Pa dëshmisë së ditës së enjte nga një dëshmitar në gjyqin për mësymjen në parlament vitin e kaluar, presidenti i Maqedonisë – dhe Shtabi i Përgjithshëm i Ushtrisë – kanë mohuar të kenë qenë pjesë e planit të koordinuar për të destabilizuar vendin.
Presidenti Gjorge Ivanov të enjten mohoi të ketë luajtur ndonjë rol në dhunën në parlament më 27 prill 2017 apo të ketë planifikuar të shpallë gjenden e jashtëzakonshme dhe të arrestojë krerët e opozitës.
Duke reaguar ndaj dëshmisë së dëgjuar në gjykatë, zyra e tij e quajti “një plan të dyshuar për shpalljen e gjendjes së jashtëzakonshme më 27 prill 2017 thjesht një më shumë në vrazhdën e përpjekjeve të dëshpëruara për të ndërtuar një skenar i cili, pa asnjë bazë, do të implikonte presidentin si pjesë e ngjarjeve të 27 prillit”.
Më herët të enjten, një i pandehur kryesor në gjyqin për mësymjen në parlament, Aleksandar Vasilevski i njohur ndryshe si Ninja, tha në Gjykatën Penale të Shkupit se ngjarjet e asaj dite ishin planifikuar dhe koordinuar nga kati i tetë i selisë së partisë së atëhershme qeverisëse VMRO DPMNE .
Vasilevski tha se plani ishte që dhuna synonte që presidenti Ivanov të shpallte gjendjen e jashtëzakonshme dhe të nxirrte ushtrinë në rrugë, duke penguar kështu formimin e një qeverie të re. Ai tha se kjo nuk ndodhi për shkak të presionit të fortë ndërkombëtar ndaj Ivanovit për të mos e bërë këtë.
Shtabi i Përgjithshëm i Ushtrisë gjithashtu hodhi poshtë përfshirjen e tij të dyshuar në këto ngjarje, duke këmbëngulur se ky ishte “dezinformim”. Ai tha se mbetej i gatshëm të bashkëpunonte me hetimin.
Hetimi mbi mësymjen më parë tregoi se disa oficerë të ushtrisë dhe ushtarë profesionistë ishin pjesë e ngjarjeve.
Megjithatë, asnjë nga ushtria nuk ka përfunduar në mesin e 30 të pandehurve që tani janë në gjyq për përfshirjen e tyre.
Partia tani opozitare VMRO DPMNE nuk ka bërë asnjë koment për pretendimet se ish-anëtarë të lartë të partisë organizuan skenat e dhunshme.
I vetmi reagim ka ardhur nga ish-zëvendësministrja e drejtësisë Biljana Briskovska, e cila u përmend gjithashtu në dëshminë e Vasilevskit si pjesë e strukturës organizative.
“Jam pa fjalë nga mungesa e së vërtetës në dëshminë që më referohet mua dhe e hedh totalisht poshtë si të pavërtetë,” tha shkurtimisht Briskovska të enjten.
Briskovska tashmë është në gjyq për përfshirjen e dyshuar në ngjarje, por ende mbetet aktive në politikë si një përfaqësuese e VMRO DPMNE në një organ që po diskuton reformat gjyqësore me qeverinë.
Dëshmia nga Vasilevski mund të ndikojë në procesin e vazhdueshëm parlamentar të “pajtimit kombëtar”.
Një komision parlamentar të premten duhet të dorëzonte një projektligj për një amnisti për disa nga pjesëmarrësit në dhunën në parlament.
Pritshmëria ishte që kjo amnisti do të zbatohej për ata që nuk morën pjesë drejtpërdrejt në dhunën që la 100 të plagosur ose që nuk organizuan ngjarjet.
Megjithatë, raportet e fundit nga ky organ treguan se prezantimi do të shtyhej për javën e ardhshme.