Prokurore prej vitit 2013 në Prokurorinë e Përgjithshme, Alma Muça do të përballet të enjten me Komisionin e Pavarur të Kualifikimit. Si ka ndryshuar pasuria e saj nga viti 2003 deri në fund të vitit 2017.Alma Muça, prokurore në Prokurorinë e Përgjithshme do të përballet të enjten në seancë dëgjimore me Komisionin e Pavarur të Kualifikimit. Trupa gjyqësore që po kryen hetimin administrativ për Muçën përbëhet nga Suela Zhegu, Brunilda Bekteshi dhe Valbona Sanxhaktari.
Alma Muça e ka filluar karrierën në sistemin e akuzës në vitin 2001, fillimisht si prokurore në Prokurorinë e Tiranës. Në vitin 2013, ajo është emëruar prokurore në Prokurorinë e Përgjithshme, ku vazhdon të ushtrojë detyrën edhe sot.
Në shkurt të vitit 2017, kur mbante postin e kreut të Drejtorisë Gjyqësore, Muça u pezullua nga detyra së bashku me prokurorin Artur Selmani, pas qëndrimit të këtij të fundit për lehtësimin e akuzave ndaj tre të akuzuarve për masakrën e Çoles në Vlorë. Sipas njoftimit të Prokurorisë në atë kohë, Muça në rolin e eprores ishte në dijeni të qëndrimit të Selmanit.
Prokuroria e Përgjithshme nisi në atë kohë edhe një hetim, por tre muaj më pas, Alma Muça u rikthye në detyrë dhe hetimet për të u pushuan.
Analiza e pasurisë është një ndër tre shtyllat e rivlerësimit për prokurorët, së bashku me kontrollin e figurës dhe vlerësimin e aftësive profesionale. Skeda grafike e mëposhtme paraqet ndryshimin e pasurisë së deklaruar të prokurores Alma Muça nga viti 2003 deri në fund të vitit 2017. [Kliko për skedën në PDF]
Ky raport është prodhuar nga BIRN pas administrimit të deklaratave të pasurisë së këtij subjekti nga Inspektoriati i Lartë i Deklarimit dhe Kontrolli të Pasurive dhe Konfliktit të Interesit, ILDKPKI. Ai ka për qëllim bërjen e transparencës mbi pasurinë e gjyqtarëve dhe prokurorëve që i nënshtrohen procesit të vetingut.
Të dhënat e siguruara nga BIRN tregojnë se prokurorja Muça deklaronte pasuri familjare me vlerë 8.2 milionë lekë në vitit 2003, kur deklaroi për herë të parë pasurinë në Inspektoriatin e Lartë të Deklarimit dhe Kontrollit, ILDKPKI.
Referuar deklaratës së vitit 2003, ajo zotëronte një makinë “Renault” me vlerë 200 mijë lekë si dhe deklaronte gjendje cash prej 8 milionë lekësh. Në atë kohë, Muça ishte në të njëjtin trung familjar me prindërit dhe vëllanë, ndaj është e paqartë nëse gjendja cash është pasuri personale apo i përket të gjithë familjes.
Në fund të vitit 2017, pasuria e prokurores Alma Muça është dyfishuar, duke kapur vlerën e 17 milionë lekëve.Pasuria përbëhet nga 6.8 milionë lekë likujditete bankare, një automjet me vlerë 2.1 milionë lekë si dhe kursimet në cash të deklaruara prej vitit 2003 [subjekti nuk ka deklaruar ndryshime në vitet e mëpasme për gjendjen 8 milionë lekë].
Pas ndarjes nga jeta të babait në vitin 2017, subjekti është bërë gjithashtu pronare e një apartamenti banimi, pasi nëna dhe vëllezërit kanë hequr dorë nga pronësia përmes trashëgimisë.
Të ardhurat e prokurores Muça për periudhën deklaruese janë 14.8 milionë lekë. Rreth 83 për qind e të ardhurave kanë si burim pagën nga funksioni i prokurorit, ndërsa 11 për qind e zë falja e huasë nga familjarët.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. BIRN kreu kontrollin aritmetik/logjik për 14 vite të deklarimit dhe asnjëra prej deklaratave nuk rezulton me probleme.
BIRN ka identifikuar megjithatë si “flamuj të kuq” paqartësinë me pronësinë e gjendjes cash prej 8 milionë lekësh, që subjekti ka deklaruar në vitin 2003 si dhe marrjen e një borxhi prej 2 milionë lekësh për blerjen e një makine nga familjarët. Borxhi është marrë në vitin 2008 dhe në vitin 2010, prokurores Muça i është falur detyrimi prej 1.6 milionë lekësh.
Gjithashtu, në deklaratat e viteve 2011, 2013 dhe 2014 nuk rezultojnë të deklaruara të ardhura nga paga.
Deklarata e pasurisë së vitit 2003
Deklarata e pasurisë së vitit 2004
Deklarata e pasurisë së vitit 2005
Deklarata e pasurisë së vitit 2006
Deklarata e pasurisë së vitit 2007
Deklarata e pasurisë së vitit 2008
Deklarata e pasurisë së vitit 2009
Deklarata e pasurisë së vitit 2010
Deklarata e pasurisë së vitit 2011
Deklarata e pasurisë së vitit 2012
Deklarata e pasurisë së vitit 2013
Deklarata e pasurisë së vitit 2014
Deklarata e pasurisë së vitit 2015
Deklarata e pasurisë së vitit 2016
Deklarata e pasurisë së vitit 2017
Për më shumë dokumente vizitoni databazën tonë dokumente.reporter.al
