Maqedonia mbetet optimiste se trazirat e fundit politike në Greqi të shkaktuara nga dorëheqja e një ministri nuk do të ndalojnë miratimin e marrëveshjes historike të emrit në parlamentin në Athinë.
Ministria e jashtme e Maqedonisë të hënën tha se ka marrë “garanci” nga Greqia se qeveria e Alexis Tsipras, e cila përballet me një mocion besimi këtë javë, do të ratifikojë marrëveshjen historike të emrit në parlament.
Pasi Partia nacionaliste e Grekëve të Pavarur u largua nga koalicioni qeveritar këtë fundjavë në shenjë proteste për marrëveshjen, ministri i jashtëm i Maqedonisë, Nikola Dimitrov, zhvilloi një bisedë me ministrin e jashtëm të përkohshëm grek George Katrougkalos, tha Ministria e Jashtme e Maqedonisë.
“Dimitrovi mori garancinë se qeveria greke mbetet e vendosur për të përfunduar punën lidhur me marrëveshjen e Prespës,” tha ajo.
Të dielën, Tsipras tha gjithashtu se qeveria e tij nuk do të heqë dorë nga ratifikimi i marrëveshjes së arritur këtë verë, ashtu siç qeveria fqinje e Maqedonisë nuk u dorëzua dhe arriti të siguronte votat e nevojshme të premten.
Tsipras tha se do të thërriste një votim besimi në qeverinë e tij këtë javë, me sa duket të mërkurën, pasi Ministri i Mbrojtjes Panos Kammenos njoftoi të dielën se ai po largohej nga qeveria për shkak të kundërshtimeve të tij ndaj marrëveshjes së emrit.
Megjithatë, gazeta e përditshme greke Kathimerini të dielën shkroi se trazirat nuk kanë gjasa të rrëzojnë qeverinë e udhëhequr nga partia e majtë Syriza e Tsiprasit dhe të ndalojnë ratifikimin e marrëveshjes.
Gazeta shkroi se, nën një marrëveshje të paracaktuar midis Tsiprasit dhe Kammenos, qeveria do të mbijetonte dhe do të kishte mjaftueshëm vota për të miratuar marrëveshjen në parlament, ndërsa në të njëjtën kohë Kammenos, i cili ka qenë kundërshtar i ashpër i marrëveshjes, mund të fokusohet në përmirësimin e pozicionit të tij para zgjedhjeve parlamentare që do të mbahen në pranverë.
Gazeta theksoi se vetë Syriza ka 145 deputetë në parlamentin me 300 vende dhe mund të mbështetet edhe tek votat e disa deputetëve të tjerë. “Ata e arrijnë totalin prej 151 votash të nevojshëm për një shumicë të thjeshtë në parlamentin me 300 anëtarë”, tha gazeta. Sipas gazetës, një shumicë e ngjashme do të mbështesë edhe marrëveshjen e emrit.
Parlamenti i Maqedonisë të premten e kaloi fazën përfundimtare të miratimit të marrëveshjes për emrin e ri të vendit, Republika e Maqedonisë së Veriut – pas së cilës kryeministri Zoran Zaev i bëri thirrje palës greke që të ratifikojë marrëveshjen dhe të përfundojë procesin.
Nëse gjërat shkojnë siç është planifikuar, Greqia duhet ta bëjë këtë deri në fund të këtij muaji ose në fillim të shkurtit, pas së cilës ajo do të jetë gjithashtu vendi i parë që aprovon pranimin e e Maqedonisë në NATO me emrin e ri.
Greqia e ka kundërshtuar prej shumë kohësh emrin e Greqisë, duke e konsideruar fjalën Maqedoni pjesë të trashëgimisë helene. Megjithatë, qeveria e Tsiprasit, pavarësisht zemërimit të nacionalistëve grekë, ka pranuar një emër kompromis me një përcaktor gjeografik. BE-ja dhe SHBA-ja i kanë bërë thirrje të dyja palëve të arrijnë një marrëveshje dhe kështu t’i japin fund një prej mosmarrëveshjeve me të ashpra dhe të gjata në Ballkan.
