Prokuroria i kërkoi gjykatës pushimin e çështjes për shpifje të ngritur mbi padinë e Taulant Ballës ndaj kreut të Partisë Demokratike Lulzim Basha. Balla kërkoi dënimin e Bashës, ndërsa mbrojtësit e këtij të fundit kërkuan pafajësi.
Prokurori që shqyrtoi kallëzimin penal për shpifje të kryer nga kryetari i grupit parlamanetar të Partisë Socialiste, Taluant Balla ndaj kreut të Partisë Demokratike Lulzim Basha i kërkoi të hënën gjykatës pushimin çështjes.
Prokurori Agron Gjana në Prokurorinë pranë Gjykatës së Rrethit Gjyqësor Tiranë, u shpreh se nga hetimi është konkluduar se nga ana e Bashës “nuk janë konsumuar të gjithë elementët e veprës penale për të cilën e ka denoncuar Balla” dhe se për këtë arsye duhet të pushohet çështja.
Në të njëjtën seancë paraqitën konkluzionet edhe palët. Avokati i Ballës kërkoi shpalljen fajtor të kryetarit të PD-së Lulzim Basha dhe dënimin e tij, duke i lënë në dorë gjykatës masën dënimit. Ndërkohë që mbrojtësit e Bashës kërkuan pafajësi, duke thënë se edhe akuzuesit kishin pretenduar se informacioni ishte i vërtetë duke pretenduar se “Basha kishte nxjerrë sekret hetimorë”.
Padia e Ballës ndaj Bashës lidhet me deklaratat e këtij të fundit qershorin e vitit të kaluar për një automjet tip “Toyota Yaris” që do të mbërinte nga Gjermania, në të cilin gjendej një sasi e madhe parash të përfituara nga aktivitete kiminale.
Ai u drejtua nga grupi i deputetëve të Partisë Socialiste duke u shprehur se garantues ishte njëri prej tyre. Pak ditë më vonë, në qershorin vitit të kaluar, në portin e Durrësit u zbulua autovetura tip “Toyota Yaris”ku ishin fshehur 3.4 milionë euro, por që ishte nisur nga Belgjika.
Qëndrimi i prokurorit
Gjatë konkluzioneve përfundimtare, prokurori Gjana shpjegoi se nuk arrihet të provohet fajësia e Bashës pasi nuk egziston një lidhje direkte dhe konkrete mes deklaratave dhe atyre që rezultuan më pas. Prokurori shpjegoi se Basha ka pohuar që transportimi i parave ishte zbuluar në Gjermani, ndërkohë që automjetet erdhën nga Belgjika.
Sipas tij, komentet dhe aludimet që e lidhën këtë akuzë me Ballën janë kryer pas deklaratës së Bashës në parlament nga persona të tjerë apo nga media, por jo prej tij. Lidhur me vërtetësinë e deklaratës, prokurori Gjana shtoi se nuk mund të konkludohet aktualisht pasi çështja për transportimin e parave me anë të automjeteve tip “Toyota Yaris” është ende nën hetim. Ai i cilësoi deklaratat e Bashës si opinione dhe jo si akuza.
Menjëherë pas konkluzioneve të prokurorit të çështjes ka replikuar përfaqësuesi ligjor i Ballës, i cili e konsideroi përfaqësuesin e akuzës si të njëanshëm. Ndërkohë, vetë Balla u shpreh se i vinte keq për pozicionin e prokurorit dhe se ky i fundit edhe pse kishte pasur detyrim të informonte gjykatën për ecurinë e hetimit nuk e kishte bërë një gjë të tillë dhe se nuk e kishte thirrur ndonjëherë.
Kërkesat e palëve
Vetë Balla kërkoi dënimin e Bashës. Para se prokurori i çështjes Agron Gjana të paraqiste diskutimin përfundimtar, në seancën e të hënës kanë paraqitur konkluzionet përfundimtare edhe pala paditëse ajo ajo e paditur.
Sipas përfaqësuesit ligjor të denoncuesit Taulant Balla, Basha nuk e tregoi burimin dhe për këtë arsye rezulton të jetë i pabesueshëm e për pasojë të ketë shpifur. Ai shtoi se përhapja e deklarimeve nga ana e Bashës se Balla është porositësi apo garantuesi i transferimit të parave është një shpifje e kryer botërisht për të denigruar figurën e kreut të krupit parlamentar të PS-së. Ai kërkoi shpalljen fajtor të kryetarit të PD-së Lulzim Basha dhe dënimin e tij, duke i lënë në dorë gjykatës masën dënimit.
Nga ana tjetër, mbrojtësit ligjor të Bashës pretenduan se nuk u provua që Basha të ketë konsumuar elementët e veprës penale të shpifjes dhe se nuk mund të jetë përgjegjës nëse informacioni është i vërtetë.
Ata theksuan se vetë pala paditëse e pranon se informacioni ishte i vërtetë. “Balla pranon se Basha ka nxjerr sekret hetimor. Rezulton se informacioni egziston dhe se vetë Balla e ka pranuar”, u shprehën avokatët të cilët shtuan se Basha nuk është pjesë e grupit hetimor që ka pasur informacionin.
Avokatat e Bashës deklaruan se Balla nuk provoi se nuk është në ndjekje penale nga Prokuroria për Krime të Rënda që po heton transferimin e shumave të parave, edhe pse këtë vërtetim mund ta siguronte vetëm personi në fjalë.
Duke përmendur raste të proceseve të gjykuara nga gjykatat Evproiane, përfaqësuesit e Bashës u shprehën se kryedemokrati nuk nuk ka pasur si qëllim të dizinformojë ose dëmtojë dikë, por të informojë publikun për këtë çështje që ka interes publik. Në përfundim ata kërkuan deklarimin e pafajshëm të Bashës.
Gjyqtari i çështjes Gerdi Hoxha pasi u njoh me konkluzionet e palëve kërkoi një javë kohë për shqyrtimin e gjithë materialeve dhe marrjen e vendimit përfundimtar.
