Ambasadori i Bashkimit Europian në Tiranë Luigi Soreca bëri të ditur në një status në Tëitter se i ka kërkuar atij përmirësimin me ugjencë të kushteve në qendrën për azilkërkues në Babrru të Tiranës. Shqetësimi i tij ngrihet pas një investigimi të BIRN që vuri në pah kushte të këqija dhe keqatrajtime të refugjatëve dhe migrantëve të bllokuar në Shqipëri.
Soreca njoftoi të Enjten takimin me me Ministrin e Punëve të Brendshme Sandër Lleshaj për të diskutuar “çështje të migrimit, përfshirë situatën aktuale në qendrën e Babrrusë”.
“Kushtet e jetesës në qendër duhet që të përmirësohen urgjentisht,” shkroi Soreca në Tëitter.
Kërkesa publike e Sorecës vjen pas publikimit të një investigimi të BIRN, ku përmes intervistave me migrantë dhe refugjatë që gjenden aktualisht në Shqipëri, zbulohet se kushtet e jetesës në qendër janë të këqija, qendra është shumë përtej kapacitevete të saj dhe ushqimi është aq i pamjaftueshëm sa shumë prej refugjatëve detyrohen të lypin bukë nëpër rrugët e kryeqytetit.
Lexo edhe:
Të uritur dhe të dhunuar: Shqipëria u privon refugjatëve të drejtat minimale
Ministri i Brendshëm Sandër Lleshaj nuk dha komente në rrjetet sociale nga takimi me ambasadorin e BE-së.
Shqipëria është vend tranzit për emigrantët nga Lindja e Mesme dhe Afrika Veriore, të cilët tentojnë të mbërrijnë në vendet e Bashkimit Europian përmes Ballkanit. Ata vijnë kryesisht nga Greqia, ku kanë qëndruar ndonjëherë me muaj të tërë pasi kanë kaluar Egjeun, dhe vijojnë rrugën drejt Malit të Zi apo Kosovës.
Prej vitit 2018, fluksi i emigrantëve të parregullt të ndaluar në Shqipëri është rritur në mënyrë eksponenciale, duke e kthyer vendin në një korridor të rëndësishëm të lëvizjes së emigrantë drejt vendeve të BE-së.
Departamenti për Kufirin dhe Migracionin në Ministrinë e Brendshme i tha BIRN se numri i emigrantëve të parregullt të kapur në kufirin e gjelbër ishte 11 344 në periudhën Janar 2019-Shkurt 2020, i rritur mbi 10 herë krahasuar me vitin 2017.
Edhe numri i azilkërkuesve në Shqipëri pësoi rritje rekord brenda një kohe të shkurtër; nga 309 raste që ishin në vitin 2017, në 4386 raste në 2018-ën. Azilkërkuesit nga Siria zënë vendin e pare, të ndjekur nga irakenët dhe marokenët.
Shumëfishimi i numrit të azilkërkuesve e ka gjetur Shqipërinë të papërgatitur dhe me kapacitete minimale. Përveç Qendrës Kombëtare Pritëse për Azilkërkuesit, vendi ka në dispozicion edhe qendrën e mbyllur në Kareç të Tiranës, por të dyja qendrat nuk mund të strehojnë së bashku më shumë se 400 persona.
Kapacitetet e pamjaftueshme strehuese shoqërohen edhe me keqfinancim nga ana e qeverisë. Shqipëria shpenzon vetëm 330 lekë [2.6 euro] si kuotë ditore për çdo refugjat; vlerë kjo e pandryshuar prej një dekade dhe e pamjaftueshme për të shuar urinë.
