Ministria e Financave bëri të ditur në një njoftim për shtyp se procesi i emetimit të bondeve sovrane në euro me një normë interesi vjetor prej 3.5%. Paratë nevojiten për të ripaguar bonde sovrane të emetuara më herët nga qeveritë “Berisha-Meta” dhe “Rama-Meta”.
Shqipëria arriti të emetojë 650 milionë euro bonde sovrane të martën më 9 qershor në një ankand ndërkombëtar në të cilin interesi mesatar i pranuar ishte 3.5%. Ministria e Financave publikoi rezultatin e ankandit në një njoftim për shtyp që mban datën 11 qershor ndërsa lajmi për emetimin u publikua fillimisht nga Kryeministri Edi Rama në një fjalim të mbajtur për ndjekësit e tij në rrjetin social Facebook. Bondet kanë një afat maturimi 7 vjeçar.
Shuma prej 650 milionë eurosh do të përdoret për të shlyer bonde të emetuara në të shkuarën me një vlerë totale prej 500 milionë eurosh.
Shqipëria ka emetuar bonde sovrane fillimisht në vitin 2010 e më pas më 2015 dhe 2018 dhe në të gjitha rastet, rifinancimi i bondeve të emetuara më parë ka qenë një proces me pikëpyetje duke rritur rrezikun e një krize likujditeti në tregun e borxheve.
Aktualisht qeveria shqiptare ka 8.9 miliardë euro borxhe, nga të cilat, 4.2 miliardë janë marrë nga subjekte të huaja dhe 4.7 miliardë është borxh i brendshëm.
