Kryeministri Edi Rama kërkoi që marrëveshja e 5 qershorit për ndryshime në kodin zgjedhor të rihapet për të akomoduar atë që ai e prezantoi si kërkesë të opozitës parlamentare ndërsa opozita jashtëparlamentare refuzoi prerazi çdo propozim shtesë.
Palët politike në Shqipëri përfunduan pa ndonjë rezultat të hënën një takim të nivelit të lartë ku u diskutua pa praninë e publikut kërkesa e kryeministrit Edi Rama për të ndryshuar kushtetutën.
Opozita jashtëparlamentare kundërshtoi prerazi kërkesat e kryeministrit ndërsa ky i fundit u përpoq të justifikojë pozicionin e tij duke argumentuar se në parlament, një grup deputetësh të opozitës kanë vendosur kushte shtesë dhe kërkojnë ndryshime kushtetuese, të cilat ai i mbështet.
Në fund, Rama shpalli tryezën një hap pozitiv dhe kërkoi vijimin e bisedimeve ndërsa Gazmend Bardhi nga Partia Demokratike deklaroi prerazi se partia e tij nuk ka në plan të diskutojë asgjë tjetër.
“Kemi qëndrim sipas nesh shumë të qartë ka dhe një realitet politik i cili imponon një qasje qe për ne është e diktuar si forca më e madhe, por që kemi dhe detyrimin të krijojmë një proces dhe të arrijmë një rezultat ku nëse të gjitha palët nuk janë 100% dakord me të gjithë, së paku secila nga palët të ketë pjesën e vet le të themi,” deklaroi Rama në kërkesën e tij për të rihapur bisedimet për marrëveshjen e 5 qershorit.
“Sot na u konfirmua që ne do të duhet të rihapim edhe një herë çështje që ne kemi rënë dakord. Apeli jonë ishte që ne nuk mund të hedhim në kosh një punë 6 mujore të Këshillit Politik. Ne nuk mundemi që pas 6 muajsh të themi që kemi ndryshuar mendje,” deklaroi Gazmend Bardhi.
Shqipëria duhet të miratojë ndryshime në kodin zgjedhor të vendit jo më vonë se sa 30 korriku i këtij viti ndërsa diplomacia e aleatëve perëndimorë të vendit është angazhuar tashmë prej muajsh për të ndërmjetësuar arritjen e një marrëveshjeje.
Arritja e një marrëveshjeje për ndryshime elektorale konsiderohet me rëndësi nga njëra anë për shkak se përbën një kusht për hapjen e bisedimeve për anëtarësim mes Shqipërisë dhe BE-së dhe nga ana tjetër sepse shihet si një mënyrë për të rikthyer partitë kryesore të opozitës në të bërit politikë brenda institucioneve.
Në 5 qershor, pas më shumë se gjashtë muajsh diskutimesh, partitë kryesore të vendit e arritën një marrëveshje nën presionin e vazhdueshëm dhe të hapur të ndërkombëtarëve për të kryer disa ndryshime në administrimin e zgjedhjeve. Por marrëveshja nuk është miratuar ende në parlament ku shumica socialiste duket se pretendon se nuk ka vullnet politik nga “opozita parlamentare” për ta votuar atë.
Opozita parlamentare përbëhet nga disa dhjetëra deputetë të cilët u kandiduan nga PD dhe LSI në zgjedhjet e vitit 2017, kryesisht në fund të listave të mbyllura përkatëse, por e gjetën veten në parlament pasi deputetët e këtyre dy partive vendosën të heqin dorë nga mandatet në vitin 2019 në përpjekje për të krijuar një krizë parlamentare dhe zgjedhje të parakohshme.
Javën e kaluar, kryeministri Edi Rama shkaktoi kritika të gjera nga opozita vendëse dhe zyrtarë të ndryshëm në Europë për vendimin për të mbështetur kërkesën e “opozitës parlamentare” për ndryshimin e kushtetutës, ndalimin e koalicioneve parazgjedhore, rritjen e pragut në masën 5% dhe një premtim për hapjen e pjesshme të listave të kandidatëve të partive. Kjo pikë e fundit, ndonëse prezantohet nga Rama si ndryshimi kryesor, nuk është konkretizuar në një propozim formal dhe nuk dihet se si mund të funksionojë.
