Shqipëria shënoi numrin më të lartë të viktimave dhe numrin më të lartë të infektimeve ditore të hënën, bënë të ditur autoritetet shëndetësore, të cilat e konsideruan gjendjen “me intensitet mesatar”.
Dymbëdhjetë qytetarë shqiptarë u ndanë nga jeta gjatë 24 orëve të fundit si pasojë e sëmundjes COVID-19 të shkaktuar nga virusi SARS-CoV-2 ndërkohë që 525 raste të reja pozitive u konfirmuan nga laboratorët e sektorit publik.
Një 34 vjeçar nga Durrësi është më i riu mes të vdekurve të 24 orëve të fundit ndërsa një 76 vjeçare nga Tirana është më e moshuara.
Rreth 12 mijë shqiptarë janë të konfirmuar të sëmurë aktualisht.
Në tre spitalet e caktuara për të trajtuar sëmundjen COVID-19 gjenden të shtruar 360 qytetarë.
Komiteti Teknik ndërmorri masa shtesë sot, përfshirë ndalim qarkullimi gjatë orëve të natës për të gjithë popullsinë dhe punë në distancë për një pjesë të administratës publike.