Qeveria e re e Malit të Zi ka marrë një hua prej 750 milionë eurosh për të mbuluar boshllëqet në rritje në buxhetin e shtetit, duke shkaktuar kështu shqetësime për rritjen e borxhit publik.
Mali i Zi ka marrë një hua prej 750 milionë eurosh, kredia më e madhe e marrë në dy dekada, për të mbushur boshllëqet e mëdha në buxhetin e 2021.
Të mërkurën, Ministria e Financave dhe Kujdesit Social sqaroi se vendi e mori huan nga BofA Securities, Citigroup, Erste dhe grupi i Société General, duke shtuar se ajo do të shlyhet për shtatë vjet me 2.95 për qind interes.
Ministri Milojko Spajiç tha se kjo ishte mënyra e vetme për të mbajtur financat publike të qëndrueshme pasi vendi shpenzoi shuma të mëdha parash për pasojat e pandemisë së COVID-19.
“Sot Mali i Zi ka një të ardhme ekonomike. Shkarkimet masive, uljet e pagave dhe pensioneve dhe skenarë të tjerë që ishin parashikuar për qeverinë e re u shmangën në mënyrën më të mirë”, tha Spajic për mediat. “Janë siguruar para për të shlyer huat e vjetra të pafavorshme dhe për të investuar në rritjen dhe rimëkëmbjen tonë”, shtoi ai.
Por kredia e re do të rrisë borxhin publik të Malit të Zi, i cili në fund të vitit të kaluar ishte i barabartë me 65 për qind të PBB-së. Më 24 shtator, Zyra e Statistikave e Malit të Zi tha që PBB-ja ra me 20.2 për qind në qershor dhe vendi mund ta mbyllë vitin 2020 me një borxh publik të barabartë me rreth 90 për qind të PBB-së.
Më 14 tetor, FMN-ja paralajmëroi se Mali i Zi në vitin 2020 do të përballet me tkurrjen e tij më të madhe ekonomike prej gati 12.4 për qind që nga pavarësia në 2006.
FMN-ja i kërkoi qeverisë të planifikojë me kujdes investimet publike dhe mos bëjë shpenzime të mëdha në infrastrukturë derisa borxhi publik të ulet.
Një deputet i opozitës i Partisë Social Demokrate, Rasko Konjeviç, akuzoi qeverinë e re të Zdravko Krivokapiç se po vazhdon politikën ekonomike me shpenzime të larta të Partisë Demokratike të Socialistëve të rrëzuar së fundmi, DPS.
“Asnjë mbledhje borxhi tatimos, asnjë ulje shpenzimesh dhe mendoj se Partia Demokratike e Socialistëve e mbështet këtë”, shkroi Konjeviç në Tëitter.
Më 2 tetor, Ministria e Financave tha se deficiti buxhetor për tetë muajt e parë të vitit kishte qenë 312 milionë euro, i barabartë me 6.8 për qind të PBB-së, duke theksuar se situata e shkaktuar nga COVID-19 kishte ulur mbledhjen e të ardhurave. Turizmi, një burim kryesor i të ardhurave për vendin, u godit rëndë këtë vit nga pandemia.
Shpenzimet në infrastrukturë kanë bërë gjithashtu që të shpenzohen para. Më 7 Mars, agjencia e vlerësimit të kredisë Standard & Poor's e uli parashikimin e saj për vlerësimet e Malit të Zi nga pozitiv në të qëndrueshëm.
Ajo theksoi koston e lartë të autostradës Bar-Boljare 169 kilometra, që u vlerësua se ishte e barabartë me 45 për qind të PBB-së.
Në vitin 2014, Mali i Zi mori një hua prej 944 milionë dollarësh nga Exim Bank i Kinës për të ndërtuar pjesën e parë të autostradës. Shlyerja e parë vjetore prej 67.5 milionë dollarësh pritet të bëhet vitin e ardhshëm. Pjesa e parë e autostradës u ndërtua nga China Road and Bridge Corporation, CRBC.
Më 4 dhjetor, parlamenti votoi qeverinë e parë në tre dekada që nuk do të drejtohet nga partia e presidentit Milo Djukanoviç. Kryeministri i ri Krivokapiç ka thënë se e ashtuquajtura qeveri e tij eksperte e përbërë nga 12 ministra jopartiakë do të përqendrohet tek ekonomia dhe reformat.
