Shumica në nënkomisionin e Kuvendit për zgjedhjen e anëtarëve të Këshillit të Lartë Gjyqësor dhe Këshillit të Lartë të Prokurorisë nga bota akademike përsëriti formalisht të hënën procedurën e shortit për zgjedhjen e anëtarëve të rinj në të dy këshillat, pavarësisht kontestimeve të opozitës.
Në shortin e 21 shkurtit, në garë ishin sërish të njëjtët kandidatë: Ilir Rusi, Orjona Muçollari, Yllka Ruka dhe Mirela Bogdani të cilët nuk morën votat e kërkuara në seancën e kaluar të parlamentit.
Deputetët e PD-së Gazmend Bardhi dhe Dhurata Çupi kundërshtuan sërish procedurën, duke këmbëngul që gara të rihapej. Por kryetarja e nënkomisionit Klotilda Bushka tha se procedura të të vijonte në të njëjtën formë si edhe në mbledhjet e mëparshme.
Shorti i hedhur për anëtarët e rinj në Këshillin e Lartë Gjyqësor nxori Ilir Rusin në vendin e Maksim Çokut në Këshillin e Lartë Gjyqësor dhe Yllka Rukën në vendin e Erjon Muharremajt. Orjona Muccollari nuk u përzgjodh në asnjë prej vendeve.
Ndërkohë në garën për dy vendet vakante në KLP-së mbeti si kandidate vetëm Mirela Bogdani. Kryetarja e nënkomisionit Klotilda Bushka njoftoi fillimisht se nuk ishte nevoja për short dhe se Bogdani merrte vendin e Gent Ibrahimit në Këshillin e Lartë të Prokurorisë. Por deputeti i Partisë Demokratike Gazment Bardhi ndërhyri duke e cilësuar procedurën antikushtetuese. Bardhi tha se Bushka po kryente emërim në këtë rast dhe se nuk e kishte tagrin.
Pas kësaj ndërhyrje dhe kërkesës së Bardhit për të hapur garën për dy vende vakante dhe jo një, Bushka kërkoi vijimin e shortit edhe pse në vazo kishte vetëm një emër për dy vende vakante. Pas nxjerrjes së emrit të Mirela Bogdanit, Bushka njoftoi se vendi tjetër rishpallej vakant.
Shorti i të hënës është përfundimtarë pasi tre emrat që dolën prej tij cilësohen të emëruar pavarësisht numrit të votave që do të marrin në seancën plenare.
Pas mbledhjes në një njoftim në rrjetet sociale Sekretari i Përgjithshëm i Partisë Demokratike Gazmend Bardhi njoftoi se PD do të padiste në Gjykatën Kushtetuese këtë proces. “Kuvendi shkeli Kushtetutën dhe ligjin në zgjedhjen e anëtarëve të Këshillit të Lartë të Prokurorisë, duke bërë proces fiktiv shorti, ku për dy vende vakante në “short” u hodh vetëm një kandidat! PD do të ankimojë në Gjykatën Kushtetuese vendimin e sotëm antikushtetues. Drejtësia e pavarur është element kyç për shtetin ligjor”, thuhet në njoftimin e shpërndarë nga Bardhi.
