Kërkesa u depozitua për herë të dytë nga kreu i grupit parlamentar demokrat, Enkelejd Alibeaj, pas plotësimit të nënshkrimeve të nevojshme.
Kërkesa e parë u rrëzua, pasi në momentin e fundit u tërhoq nga firma deputeti Agron Duka.
Kreu i grupit parlamentar socialist, Taulant Balla, tha pas mbledhjes se kërkesa nuk ishte pranuar për arsye proceduriale.
“Firma e një deputeti vlen vetëm për një dokument, jo të merret nga njëri dokument në tjetrin. Nuk mund të marrësh një kërkesë të rrëzuar dhe ta depozitosh prapë me një numër të ri protokolli. Firma e një deputeti, zyrtari, një qytetari vlen vetëm për një dokument,” tha ai.
Por sipas Alibeajt, mazhoranca po i pengonte opozitës mekanizmin ligjor të kontrollit parlamentar.
“Ne ridepozituam kërkesën, tashmë jo me 35, por me 37 firma. Në mënyrën më antikushtetuese, antiligjore, nga ana e anëtarëve të mazhorancës në konferencë rrëzohet kjo kërkesë,” tha ai. Sipas Alibeajt, kjo kërkesë “demaskoi qëndrimin e mazhorancës”.
“Investimet strategjike, familjare strategjike në kurriz të pasurive publike, duket se është një skandal i madh, ndaj i largohen si djalli nga temjani,” u shpreh ai.
Përmendja e emrit të Gaçit në formulimin e kërkesës u bë shkak që deputeti Agron Duka të tërheqë firmën e tij një javë më parë.
Qëllimi i komisionit ishte verifikimi në thellësi i ligjshmërisë së praktikave të ndjekura nga Komiteti i Investimeve Strategjike dhe institucionet e tjera relevante për dhënien e statusit të investitorit strategjik.
Deputetët e opozitës i referohen rasteve të publikuara në media, duke i cilësuar si indicie se “mbi këto projekte ekzistojnë dyshime të arsyeshme për abuzime, favorizim, klientelizëm dhe arbitraritet”.
Referuar vendimeve të KIS që favorizojnë njerëz të afërt me pushtetin, opozita përmend në kërkesën e saj rastin e anëtarit socialist të Këshillit Bashkiak Tiranë, Gazmend Paja, familjarëve të ministres së Jashtme, Olta Xhaçka, të cilët që kanë përfituar statusin “investitor strategjik” dhe të drejtën e përdorimit të brigjeve të detit. Po ashtu, hetimi parlamentar synon të zbardhë dhe problematikën me vendimet e dhëna në zonat e mbrojtura.
Ligji për “investimet strategjike” është kritikuar për favorizimin e klientelizmit dhe një grushti biznesmenësh dhe investimet e tyre në bregdet. Në një investigim të fundit, BIRN zbuloi gjithashtu se nga 17 projekte të miratuara nga Komiteti i Investimeve Strategjike gjatë vitit 2021, katër prej tyre ndodhen në zona të mbrojtura ose afër tyre – çka ka shqetësuar ekspertët dhe aktivistët mjedisorë.
I miratuar në vitin 2015, ai ishte parashikuar të ishte i përkohshëm, por mazhoranca votoi dy herë shtyrjen e afatit të tij.
Ky ligj i njeh statusin investitor strategjik në turizëm çdo projekti që investon më shumë se 5 milionë euro dhe punëson 80 punëtorë. Në dhjetor të vitit 2015, qeveria ka miratuar gjithashtu 10 vendime me qëllim lehtësimin dhe rregullimin e procedurave për investitorët strategjikë, duke i mundësuar konsolidimin e titujve të pronësisë.
