Një minator 51 vjeç u transportua me urgjencë në kryeqytet, pasi mori plagë të rënda gjatë një aksidenti në punë në galeritë e kromit të Albchrome në zonën e Bulqizës.
Policia e Bulqizës njoftoi se aksidenti ndodhi në orën 12:00, por pa dhënë shumë detaje për rrethanat e ngjarjes. “Rreth orës 12.00, është dërguar për ndihmë mjekësore në spitalin e Bulqizë, shtetasi B. T.,
51 vjeç, i cili gjatë punës në një minierë kromi në qytetin e Bulqizës, është aksidentuar duke u lënduar në këmbë”, njoftoi policia.
Burime nga Spitali i Bulqizës i than BIRN se minatori kishte dëmtime në gishtat e këmbës së djathtë, dhe u dërgua për ndihmë më të specializuar mjekësore në Tiranë, jashtë rrezikut për jetën.
Kompania nuk qe e arritshme për koment. Galeritë e Bulqizës janë një prej zonave me më shumë aksidente të rënda në punë në Shqipëri, sipas të dhënave nga Inspektorati i Punës. Vitin e kaluar në miniera e karriera u aksidentuan 28 persona, 6 prej të cilëve humbën jetën.
