Një ditë para votimit, socialistët kanë njoftuar një mbledhje të kryesisë së partisë për të miratuar kandidatin zyrtar për president, pasi kaluan tre raundet e para të votimit pa propozuar asnjë emër.
Kryetari grupit socialist, Taulant Balla propozoi që raundi i katërt të mbahet të shtunën ndryshe nga raundet e tjera që ishin mbajtur të hënave. “Partia Socialiste deri në orën 12: 00 të po kësaj dite duhet të depozitojë kandidaturën,” tha Balla.
Raundi i katërt pritet të jetë një proces i njëanshëm, pavarësisht ftesave publike për opozitën që të bëhet pjesë e procesit. Në këtë raund, mazhorancës i duhen vetëm 71 vota për të zgjedhur presidentin e vet.
Balla tha se opozitës iu dha mundësia për të bërë propozime gjatë raundeve të para, por ajo nuk e shfrytëzoi këtë të drejtë kushtetuese. “Ne presim nëse doni të përfshiheni në këtë proces dhe të kemi dakordësi,” iu drejtua ai kolegëve të partive opozitare.
Deputeti i PD-së, Agron Gjekmarkaj, u përgjigj se opozita asnjëherë nuk ka pasur një ofertë reale për të zgjedhur Presidentin e Republikës. “Ju keni hyrë në fazën për ta zgjedhur vetë, nuk i keni ofruar asgjë opozitës sepse ia ofron Kushtetuta, jo ju,” tha Gjekmarkaj.
Ndërsa kreu i Partisë Republikane, Fatmir Mediu shprehu keqardhjen që vendi humbi mundësinë për të zgjedhur një president mbi palët.
Socialistët nuk u përfshinë në procesin e zgjedhjes së presidentit, duke i lënë tre raundet e para që kërkonin një shumicë të cilësuar votash të ezauroheshin pa asnjë kandidat. Ndërsa opozita e përçarë mes vetes qarkulloi në publik disa emra, por nuk dërgoi zyrtarisht në Kuvend asnjërin prej tyre.
