Ballanca vërejti se Policia e Shtetit ka shkelur ligjin në ndalimin e gazetarëve për të kryer punën e tyre.
“Policia nuk ka vepruar në parashikimet e vetë ligjit për tubimet përsa i përket të drejtës së gazetarëve. Ka ndaluar gazetarët në punën e tyre dhe kemi bërë disa rekomandime,” tha ajo para komisionit.
Në raportin e publikuar në formë elektronike në faqen e Kuvendit preken disa raste konkrete të sjelljes së policisë me mediat dhe me qytetarët në protesta. “Me shumë shqetësim nga ana jonë janë ndjekur edhe rastet e shoqërimit të disa punonjësve të medias gjatë protestave që pasuan vrasjen tragjike të 25 vjeçarit K. R., të cilët kanë qenë në kryerje të detyrës duke raportuar në terren,” thuhet në raport.
Raporti i fundit i organizatës Reporterë pa Kufij ngriti shqetësimin e përballjes së gazetarëve me dhunë policore në Shqipëri, por kryeministri Edi Rama i cilësoi ato si “gënjeshtra”.
Por konstatimet e dhunës policore nga Avokati i Popullit janë shoqëruar me hetime administrative dhe rekomandime për Drejtorinë e Përgjithshme të Policisë së Shtetit, bëri të ditur Ballanca.
Avokati i Popullit ka hetuar për disa ankesa nga qytetarët për dhunën policore gjatë protestave, ku në fund është konstatuar se policia ka tejkaluar kompetencat e saj gjatë ushtrimit të detyrës duke rrezikuar jetën e njerëzve.
“Konstatuam se protestuesit, në katër raste, nuk janë lajmëruar për përdorimin e gazit lotsjellës dhe ujit me presion, ka patur përdorim të paarsyeshëm të ujit me presion si dhe nuk është marrë parasysh rreziku i përdorimit të gazit lotsjellës në një zonë me dendësi të lartë banimi,” thuhet në raport.
Për shkeljet e konstatuara, Avokati i Popullit i ka rekomanduar Policisë së Shtetit që të jetë profesionale, të identifikojë përgjegjësit dhe të trajnojë efektivët e policisë në menaxhimin e protestave.
Ballanca gjithashtu ngriti shqetësimin e mosgarantimit të të Drejtave të Njeriut nëpër komisariate, ku sipas saj ka mbipopullim dhe nuk plotësohen standardet e sigurisë. “Sa i përket gjendjes në komisariatet e Tiranës, në mënyrë të veçantë është katastrofike, tërësisht në kundërshtim me standardet për qëndrimin e personave të privuar nga liria”- tha ajo.
Sipas Ballancës, edhe një investim për dhoma të reja që është bërë nuk i plotëson standardet e sigurisë dhe problemi vijon të mbetet i pazgjidhur.
