Këshilli për Rregulloren, Mandatet dhe Imunitetin nuk arriti dot të shqyrtojë të premten mocionin e 1/10 së deputetëve për ndjekjen e procedurës parlamentare për konstatimin e pavlefshmërisë dhe mbarimit te mandatit të deputetes Olta Xhaçka.
Bashkëshorti biznesmen i saj, Artan Gaçi, fitoi statusin Investitor Strategjik dhe më pas iu dha e drejta e përdorimit të bregdetit për 30 vite nga qeveria duke ngritur dyshime për konflikt interesi.
PD i referohet neneve kushtetuese që ndalojnë deputetin që të përfitojë të mira publike.
“Dhënia e pasurisë publike për qëllime fitimi dhe ushtrimi të veprimtarive fitimprurëse është bërë në shkelje flagrante të ndalimeve kushtetuese dhe ligjore, që ndalojnë deputetin dhe për efekt të ligjit bashkëshortin e tij, të përfitojë pasuri të shtetit apo të kryejë veprimtari fitimprurëse që burojnë nga pasuritë e shtetit. Ky fakt përbën shkelje të rëndë të ligjit, që passjell mbarimin/pavlefshmërinë e mandatit të deputetit, sipas neneve 70/2-3 dhe 71/2/c të Kushtetutës,” thuhet në kërkesën e PD depozituar në Kuvend të hënën.
Anëtarët socialistë kërkuan kohë që të njihen me dokumentacionin përkatës të mocionit duke propozuar që mbledhja e këshillit të ndërpritej.
“Do të ishte në seriozitet të punës së këtij këshilli që të gjithë kolegët të lexojnë materialet para fillimit të prezantimit të kërkesës. Kërkesa ka ardhur në datën 20, kohë kur ne nuk kemi qenë në Tiranë, ndaj do kërkoja që ta shtyjmë mbledhjen tjetër prezantimin dhe diskutim për këtë çështje”, parashtroi kërkesën Klotilda Bushka.
Ndërsa Taulant Balla e cilësoi mocionin për mandatin e Xhaçkës si një çështje “pa substancë” dhe aludoi se kolegët demokratë po e përdornin për “teatër”.
“E kemi parë, nuk ka thelb dhe substancë si çështje. Nëse keni ndërmend të bëni teatër, s'ka”- tha Balla duke kërkuar kohë për verifikimin e dokumentacionit të dorëzuar nga PD-ja.
Ai e cilësoi rolin e këshillit procedurial në këtë çështje. “E heq Gjykata Kushtetuese mandatin, se kemi ne këtë të drejtë. Ne shohim kërkesën dhe provat që e mbështesin mocionin”-shtoi ai.
Kërkesa për shtyrje gjeti edhe mirëkuptimin e kryetarit të grupit të PD-së, Enkelejd Alibeaj, por me kusht që mbledhja të ezauronte prezantimin nga pala kërkuese të argumenteve për mocionin.
“Për respekt të pozitës së secilit deputet, të ecim sot me prezantimin dhe ta diskutojmë në mbledhjen e radhës”, tha ai.
Kryetarja e Kuvendit, Lindita Nikolla, në cilësinë e drejtueses, vendosi të ndërpresë mbledhjen dhe ta shtyjë për një afat të pacaktuar shqyrtimin e mocionit për mandatin e deputetes Xhaçka.
Pas mbledhjes deputeti Saimir Korreshi, akuzoi PS se po tentonte të zvarriste çështjen. “Ne do ta çojmë edhe në SPAK. Gjithashtu PD po mbledh firmat për ta çuar vetë në Kushtetuese”- tha ai.
Këshilli i Mandateve nuk vendos për papajtueshmërinë e mandatit, por është mekanizmi parlamentar për të çuar çështjen në Gjykatën Kushtetuese.
Mocioni për Xhaçkën bazohet edhe në dy precedentë të mëparshëm, ku Gjykata Kushtetuese vendosi papajtueshmërinë dhe heqjen e mandatit për Ilir Beqjen dhe Koço Kokëdhimën, pasi përfituan fonde publike gjatë kohës që ishin deputetë.
Më herët socialistët bllokuan kërkesat e përsëritura të opozitës për një komision hetimor për investimet strategjike duke marrë shkaks nga rasti “Xhaçka” dhe raste të tjera ku janë përfshirë njerëz të afërt me pushtetin.
