Kryetari i Grupit Parlamentar socialist, Taulant Balla, tha pas mbledhjes së deputetëve se është rënë dakord që të ruhet harta aktuale, e cila është rezultat i një reforme të votuar në mënyrë të njëanshme nga socialistët në vitin 2014.
“Kemi konkluaduar që pozicioni ynë në Komisionin e Posaçëm të Reformës Administrastive Territoriale do të jetë t’i qëndrojmë ndarjes aktuale administrative territoriale me 61 bashki dhe 12 qarqe”- tha ai.
Balla e argumentoi qëndrimin me fakti që vetëm 7 vite kanë kaluar nga reforma e fundit dhe siç tha ai, “që të gjitha shërbimet publike në të gjithë territorin janë përmirësuar për shkak të kësaj reforme të Njësisë Administrative Territoriale”.
Sipas Ballës vendimi politik kishte ardhur pas konsultimit me deputëtët anëtarë në komsiion dhe ekspertët e PS-së. Ai shtoi se kishin zgjedhur të ruanin ndarjen aktuale administrative pasi ishin njohur me propozimet për një numër më të madh bashkish dhe propozimeve për më pak bashki.
Deklarata e Ballës nuk u mirëprit nga deputetët e Partisë Demokratike. Bashkëkryetarja e këtij komisioni Dhurata Çupi e cilësoi tallje me parlamentin dhe organizatat ndërkombëtare që ishin përfshirë në proces.
“Ështe shpërdorim i taksave të qytetarëve, për një proçes të paracaktuar nga vullneti i Edi Ramës. Edi Rama ka frikë të përballet në një betejë të vertete elektorale dhe kërkon rezultat ne tavoline”- deklaroi ajo në një status në facebook, duke lajmëruar se do të kërkohej referendum për ndryshimin e hartës.
Grupi “Alibeaj” në PD bëri publik para pak ditësh një draft-projekt për 92 bashki dhe 6 rajone duke parashikuar një konfigurim të ri administrativ me rikthimin e bashkive të vogla dhe bashkive rurale.
Pas disa seancash dëgjimore me ekspertë dhe drejtues të pushtetit vendor, tryeza diskutimi me organizatat ndërkombëtare, pritej që palët të hartonin një raport konkluzionesh për reformën territoriale para fundit të shtatorit.
Në vitin 2014, një komision i ngjashëm i përbashkët nuk arriti dot të miratojë me konsensus hartën e re territoriale, e cila përcaktoi 61 bashkitë e vendit. Harta u votua vetëm me votat e socialistëve në pushtet dhe votat e partive të vogla aleate PDIU e LSI. Gjykata Kushtetuese hodhi poshtë një kërkesë të PD-së për shfuqizimin e kësaj reforme.
