Deputetët kërkojnë mbledhjen ditën e mërkurë me rend dite “vijimin e shqyrtimit të mocionit të 1/10 së deputetëve përfaqësues të grupit paarlamentar të PD për ndjekjen e procedurave parlamentare për konstatimin e pavlefshmërisë dhe mbarimit të mandatit të deputetes Olta Xhaçka”.
Këshilli thirret me vendim të kryetares së Kuvendit, Lindita Nikolla, e cila ndodhet në një udhëtim zyrtar jashtë vendit deri të enjten. Kabineti i Nikollës i tha BIRN-it se mbledhja do të mbahet të premten në orën 9:30.
Opozita dorëzoi dy mocione me objekt heqjen e mandatit të Xhaçkës pasi bashkëshorti i saj Artan Gaçi u shpall nga qeveria “investitor strategjik” dhe iu dha tokë në bregdet në përdorim për hotelin e tij në Dhërmi.
PD në dy kërkesat e saj pretendon se ky është dhunim i hapur i nenit 70, pika 3 e Kushtetutës, ku thuhet se “deputetët nuk mund të kryejnë asnjë veprimtari fitimprurëse që buron nga pasuria e shtetit ose e pushtetit vendor dhe as të fitojnë pasuri të këtyre.”
Në mbledhjen e fundit më 15 korrik deputeti demokrat, Agron Shehaj, në emër të grupit firmëtar pretendoi se ministrja me qëllim kishte krijuar një skemë fiktive me familjarët e saj për të përfituar nga pasuria publike. Ai iu referua marrëveshjes mes bashkëshortit dhe partneres së vëllait të Xhaçkës për statusin “investitor strategjik”.
Kryetarja e Kuvendit në rolin e drejtueses së mbledhjes i la kohë avokatit të ministres, Genci Çifligu, që të bënte oponencën ndaj pretendimeve të Shehajt duke shtyrë pa afat mbledhjen e radhës
Socialistët e zvarritën procesin e vendimmarrjes në javët e fundit të mbylljes së sesionit parlamentar dhe nuk thirrën një mbledhje të re që pas nisjes së sesionit të ri më 5 shtator.
Mocionet diskutohen në Këshill para se të votohen në seancë plenare për tu dërguar në Gjykatën Kushtetuese, institucioni që interpreton shkeljen e Kushtetutës në këtë rast dhe vendos për mandatin e deputetit.
Mazhoranca e kundërshtoi kërkesën me pretendimin se nuk ka vetë Xhaçka nuk ka përfituar nga pasuria publike duke paralajmëruar votën e tyre kundër.
