Të martën paradite, qendra Faktoje prezantoi gjetjet e një hulumtimi të kryer në lidhje me dezinformimin me bazë gjinore në Shqipëri dhe rolin e medias në formimin e qëndrimeve lidhur me rolet gjinore.
“Dezinformimi gjinor ndikon tek disa elementë kyçë, duke bërë që një pjesë e madhe e grave të tërhiqen nga jeta politike apo aktivizmi,” tha Klodiana Kapo, drejtore ekzekutive e Faktoje.
Hulumtimi i qendrës Faktoje.al ka përfshirë shtatë media në tërësi, përfshirë këtu portale online, të cilat janë monitoruar gjatë përiudhës janar 2018-prill 2023.
Studimi u shoqërua me pesë artikuj fakt-verifikues që përgënjeshtrojnë disa fushata dezinformimi që përmbanin narrative homofobe, seksiste apo mizogjene në lidhje me personazhe të caktuara gra, apo të komuniteteve vulnerabël në Shqipëri.
“Kemi monitoruar jo vetëm lajmet, por edhe komentet e audiencës në mediat sociale,” tha Viola Keta, kryeredaktore e Faktoje.
Sipas Kapos, shkrimet dezinformuese mbeten në portalet online dhe ndikojnë jo vetëm te individët e shenjestruar, por edhe te familjet e tyre.
Në raport konstatohet se perceptimet e ngurta për rolet gjinore dhe imazhi që nxisin një pjesë e mediave për gratë përdoren për të justifikuar dhunën ndaj grave.
Ngjashëm, edhe komisioneri kundër Diskriminimit, Robert Gajda, theksoi faktin se fushatat e dezinformimit kanë pasoja serioze në shoqëri.
“Dezinformimi dhe gjuha e urrejtjes lidhen ngushtë me njëra-tjetrën dhe ushqejnë njëra-tjetrën,”, tha ai.
Sipas Gajdës, shoqëria priret t’i njohë minorancat nëpërmjet stereotipeve dhe paragjykimeve që i servir media apo portalet online.
“Nëpërmjet dezinformimit që mediat përhapin, arrijnë të mbahen gjallë stereotipet dhe paragjykimet për grupe të caktuara që janë në minorancë”, tha Gajda.
Ekspertët theksuan se një tjetër element që ndikon në përhapjen e paragjykimeve është edhe dezinformimi i fshehur.
Edlira Çepani, drejtuese e Rrjetit për Barazi në Vendimmarrje, u shpreh se shpeshherë mediat dërgojnë mesazhe të fshehura mbi rolin e grave, nga vetë shkalla e përfaqësimit të tyre në programet televizive.
“Studimet tona tregojnë se gratë përbëjnë rreth 60% të të fturave në emisionet e mëngjesit ku flitet për kulturë, kulinari apo art, teksa në programet e mbrëmjes Talk Show ku flitet për politikë, ekonomi dhe aktualitet që kanë interes të lartë për shoqërinë kemi vetëm 21% të ftuara gra”, tha Çepani, duke nënkuptuar kështu mesazhin e fshehtë që përcillet në publik mbi rolin e grave.
