Partia Demokratike zyrtare kërkon nga Struktura e Posaçme Antikorrupsion (SPAK) që kryetarja e Kuvendit, Lindita Nikolla të mbajë përgjegjësi penale për moszbatimin e vendimit të Gjykatës Kushtetuese për votën e diasporës.
Në një kallëzim 13 faqesh që mban firmën e Sekretarit të Përgjithshëm, Enkelejd Alibeaj, sqarohet se Nikolla në cilësinë e saj si Kryetare Kuvendi nuk ka kryer asnjë veprim për të përmbushur detyrimin që lindin në vendimi i Gjykatës Kushtetuese.
Më tej citohet se Kushtetuesja ka vendosur “konstatimin e cenimit të së drejtës kushtetuese të votës së emigrantëve në zgjedhjet për Kuvendin, për shkak të boshllëkut ligjor” dhe “detyrimin e Kuvendit për plotësimin e boshllëkut ligjor brenda një viti.”
Edhe pse koha e nevojshme e përcaktuar nga trupa gjykuese është tejkaluar, PD zyrtare pretendon në kallëzim se nuk është kryer asnjë veprim.
“Deri në datën e depozitimit të këtij kallëzimi, në bazë të informacioneve publike, nuk rezulton që Kuvendi i Shqipërisë të ketë përmbushur detyrimin për zbatimin e vendimit të Gjykatës”, citohet ndër të tjera në kallëzim.
Një tjetër pretendim që ngrihet nga pala kallëzuese, lidhet me faktin se “detyrimi konsiston në ‘plotësimin e boshllëkut ligjor', pra miratimi i rregullave normative shtesë, të rangut ligj, proces që sipas Kushtetutës është kompetencë ekskluzive e Kuvendit të Shqipërisë”.
Pavarësisht se kallëzimi mban datën 7 Maj ai u publikua vetëm të premten nga zyra e shtypit e Partisë Demokratike zyrtare. Të kontaktuar nga BIRN, zyra e shtypit e Kuvendi pohoi se nuk kishin asnjë dijeni për kallëzimin.