Duke shënuar 25 vjet nga përfundimi i luftës në Kosovë, javën e ardhshme në qendër të Prishtinës do të hapet një ekspozitë që do të shfaqë mbulimin mediatik të luftës që përmbylli shekullin e 0-të në Evropë, krahas veprave artistike që trajtojnë trashëgiminë e saj.
E prodhuar nga BIRN Kosova, KALLXO.com, Bienalja e Prishtinës dhe Paper Gallery, ekspozita tre mujore “Reporting House” prezanton një seksion tërthor të artefakteve të gazetarëve, fotografëve dhe punonjësve të medias të kohës, punë këto që vendosen krahas veprave të artit bashkëkohor që eksplorojnë dhe reflektojnë mbi ndikimi i luftës së viteve 1998-1999 në dekadat që pasuan.
Ekspozita e merr emrin e saj nga muzeu i BIRN-it “Reporting House” dhe hapësira e komunitetit që po përgatitet në Sarajevë dhe që synon të tregojë historinë e shpërbërjes së Jugosllavisë përmes prizmit të mbulimit mediatik.
Në Prishtinë, ekspozita do të hapet në ish-shtëpinë e mallrave “Germia” më 10 qershor dhe do të mbyllet më 10 shtator.
“Njëzet e pesë vjet pas përfundimit të fushatës së bombardimeve të NATO-s, Kosova është një rast i rrallë në të cilin një aleancë ndërkombëtare ndërhyri për të shpëtuar jetë dhe kjo funksionoi”, tha Jeta Xharra, drejtoreshë ekzekutive e BIRN në Kosovë dhe një nga realizueset e ekspozitës.
“Që nga fundi i luftës në Kosovë, ne kemi parë kriza të tjera humanitare si Gaza, Ukraina, Siria, Afganistani në të cilat njerëzit po vdisnin dhe Perëndimi e lejoi këtë të ndodhte.”
“Kjo është arsyeja pse ne kosovarët nuk mund të lejojmë të jemi të vetëkënaqur dhe të mos i kujtojmë vetes se sa unike dhe e paprecedentë ishte lufta jonë. Edhe pse gati një milion njerëz u dëbuan nga shtëpitë e tyre, një milion njerëz u rikthyen brenda një jave pas kapitullimit të Serbisë.”
E kuruar nga Gazmend Ejupi, ekspozita “Reporting House” përmban 150 kronika televizive nga Kosova ndërmjet viteve 1992 dhe 1999 nga një sërë transmetuesish të huaj, si dhe fotografi dhe artikuj të shtypur.
Kontribuesit në këtë ekspozitë përfshijnë Jeremy Boëen dhe Ben Broën të BBC-së, fotografin e Magnum, Thomas Dëorzak, fotoreporterët kosovarë Ilaz Bylykbashi dhe Hazir Reka, Andreë Testa nga Neë York Times, themeluesin e Frontline Vaughan Smith dhe disa të tjerë.
Ekspozita do të prezantojë gjithashtu punën e artistëve Anri Sala (Shqipëri), Adrian Paci (Shqipëri), Goncalo Mabunda (Mozambik), Lala Meredith Vula (MB-Kosovë), Zhana Kadyrova (Ukrainë), Lana Cmaijcanin (Bosnje dhe Hercegovinë), Olafur Eliasson (Islandë-Danimarkë), Laura Imami (Mbretëria e Bashkuar), Besa Llugiqi (Kosovë), Vullnet Jakupi (Kosovë) dhe Vita Kasapolli (Kosovë).
Krahas ekspozitës kryesore në ish-shtëpinë e mallrave “Germia”, Hamami i Madh dhe Paper Gallery në Prishtinë synojnë të krijojnë ambient për përsiatje dhe dialog, duke nderuar kujtimin e të prekurve nga lufta në Kosovë dhe përpjekjet drejt zgjidhjes paqësore të konfliktit.
