Prokuroria e Posaçme kundër Korrupsionit dhe Krimit të Organizuar, SPAK njoftoi të martën më 28 janar se i ka kërkuar gjykatës konfiskimin e pasurive të Ervis Martinajt dhe personave të lidhur me të. Në njoftim sqarohet se Ervis Martinaj është i dyshuar për sigurim të kushteve dhe mjeteve materiale për vrasjen e Indrit Dokles, kryer në bashkëpunim të posaçëm të grupit të strukturuar kriminal.
Në përfundim të hetimit pasuror, SPAK kërkon konfiskimin e 31 pasurive të sekuestruara më parë, përfshirë kompaninë “KING KASINO” sha dhe shtatë shoqëri të tjera në pronësinë e tij apo të personave të lidhur.
Prokuroria kërkon gjithashtu sekuestrimin e një vile në Surrel të Tiranës, pesë automjeteve, dy apartamenteve në Tiranë dhe Vlorë si dhe sipërfaqe toke në Sarandë, Dhërmi, Tiranë, Patok dhe Fushë-Kuqe të Kurbinit.
Ervis Martinaj u dënua në prill 2021 nga Gjykata e Tiranës me 3 vjet e 8 muaj burg, për akuzat e organizimit të lojërave të fati, falsifikim dhe fshehje të ardhurash, sigurim të kushteve për të kryer të vrasjeve. Por ai rezulton i zhdukur që prej gushtit të vitit 2022.
Emri i Martinajt, i cili kishte një sërë biznesesh në fushën e basteve kur këto ishin ende të lejuara, është lidhur me disa ngjarje të rënda në vend. Në maj 2022 SPAK urdhëroi shpalljen në kërkim të tij, pas një operacioni të koduar “Golden Bullet”, që bazohej kryesisht në dëshmitë e një të penduari që ka pranuar se kishte marrë porosi për krime prej Martinajt.
Policia ka bërë më parë me dije se është duke hetuar zhdukjen e Ervis Martinajt prej gushtit të vitit 2022. Njëkohësisht, Martinaj është dhe në kërkim policor për veprat penale që dyshohet se ka kryer.
