Pas mbledhjes së qeverisë, ministri i Brendshëm, Ervin Hoxha, tregoi edhe shifrat se sa shqiptarë përfitojnë nga ky vendim.
“Janë rreth 500 mijë shtetas shqiptarë, të cilëve u ka përfunduar vlefshmëria e kartave të identitetit. Në këtë mënyrë, me miratimin e këtij akti do të kenë mundësinë të gjithë shtetasit shqiptarë, që jetojnë jashtë vendit për të ushtruar të drejtën e votës si një e drejtë kushtetuese”, pohoi Hoxha.
Më tej ministri shtoi se pas miratimin të këtij akti të gjithë shtetasit shqiptarë do të votojnë sipas udhëzimeve të KQZ-së, duke u regjistruar në Platformën Elektronike të Regjistrimit, të Komisionit Qendror të Zgjedhjeve.
Ndërsa të gjithë shqiptarët që jetojnë brenda vendit do duhet që të rinovojnë dokumentet e identifikimit, pasi siç tha ministri Hoxha, nuk do merret asnjë vendim për të zgjatur afatin.
Lidhur me kërkesën e Partisë Demokratike për të lejuar votimin e emigrantëve që nuk kanë asnjë dokument identifikimi shqiptar, Hoxha pohoi se kjo gjë nuk do të lejohet.
“Kjo nuk është e mundur të bëhet pasi ligji nuk e parashikon”, pohoi ministri, duke u bërë thirrje të gjithë shqiptarëve që të regjistrohen në platformën PER.
Nga ana tjetër demokratët këmbëngulin në kërkesën e tyre, duke pohuar se do të bllokojnë ndryshimet në Kodin Zgjedhor nëse nuk dëgjohet zëri i tyre. Palët kanë kohë deri në 13 shkurt për të gjetur gjuhën e përbashkët dhe për të votuar ndryshimet në Kod për të lehtësuar votimin nga jashtë.
