Vota e emigrantëve që do të aplikohet për herë të parë në zgjedhjet parlamentare të 11 majit po has problematika në regjistrimin e mijëra votuesve që nuk plotësojnë kriteret ligjore, ndërsa KQZ vlerëson se parashikimet ligjore për këtë kategori nuk po gjejnë zbatim në praktikë.
Për këtë arsye, Komisioneri Shtetëror i Zgjedhjeve Ilirjan Celibashi i kërkoi të enjten Kuvendit që të ndërhyjë në Kodin Zgjedhor për të ndryshuar afatet e ankimimit në gjykatë për votuesit nga Diaspora që kërkojnë regjistrimin në listën zgjedhore duke kërkuar riformulim të nenit 25, pika 8, të Kodit Zgjedhor.
Celibashi propozon që të përcaktohet në ligj një afat kohor “deri 30 ditë përpara datës së zgjedhjeve” për ankimimin në gjykatë të votuesve nga jashtë.
Sipas parashikimeve të dispozitës aktuale, zgjedhësi që ka paraqitur kërkesë për regjistrim në listën e zgjedhësve që votojnë nga jashtë territorit të Shqipërisë ka të drejtë të paraqesë kërkesë në Gjykatën e Shkallës së Parë të Juridiksionit të Përgjithshëm Tiranë deri 7 ditë përpara datës së zgjedhjeve, kur vëren se nuk është i regjistruar në këtë listë, ose regjistrimi i tij ka pasaktësi.
Gjykata e shqyrton dhe vendos në lidhje me kërkesën brenda 24 orëve nga data e regjistrimit të kërkesës, por jo më vonë se 5 ditë para datës së zgjedhjeve.
“Në vlerësimin tonë, nga përmbajtja e kësaj dispozite duket se objektivisht është e pamundur të realizohet procesi i votimit nga jashtë vendit në afatin 5-ditor të parashikuar”- sugjeron Celibashi duke shtuar se nga momenti kur merret vendimi i gjykatës nuk mjaftojnë 5 ditë kohë për të dërguar fletën e votimit dhe për kthimin e saj mbrapsht në KQZ.
Komisionieri propozon që kërkesat të paraqitet edhe online nëpërmjet një platforme elektronike të miratuar nga Këshilli i Lartë Gjyqësor dhe po ashtu gjykata të shqyrton dhe të vendos në lidhje me kërkesën nëpërmjet kësaj platforme brenda 48 orëve nga data e regjistrimit të kërkesës.
“Ky ndryshim do t’i siguronte zgjedhësit nga jashtë mundësinë reale për të ushtruar të drejtën e tij përmes një procesi të thjesht dhe të aksesueshëm pa u penguar nga distanca gjeografike dhe kohore”- argumenton Celibashi në letrën drejtuar Kuvendit.
Kur kanë mbetur dhe disa javë afat për regjistrimin e votuesve nga Diaspora sipas statistikave të KQZ-së deri më tani kanë bërë kërkesë për regjistrim në platformën online 129,778 zgjedhës, nga të cilët janë pranuar dhe regjistruar 100,863 votues, ndërsa u është refuzuar kërkesa 28,496 zgjedhësve të tjerë për mosplotësim të dokumenteve.
Ndërkohë qeveria miratoi të mërkurën një akt që u jep mundësinë të regjistrohen në zgjedhje të gjithë votuesve jashtë vendit që u skandon karta e identitetit dhe pasaportat biometrike duke zgjatur afatet e vlefshmërisë së tyre.
