Prokuria e Posaçme kundër Korrupsionit dhe Krimit të Organizuar, SPAK njoftoi të dielën më 27 prill se dy ditë më parë ka dorëzuar në Gjykatën e Posaçme kërkesën për konfiskimin e pasurive të shtetasve Erjon Kasmi dhe Xhulian Xhafa, të deklaruar fajtorë për një skemë mashtrimi me call-center që u zhvati qytetarëve evropianë rreth 7 milionë euro.
Hetimi i pasurive të Kasmit dhe Xhafës filloi pas regjistrimit të procedimit penal të vitit 2021 ndaj tyre, për veprat penale “Mashtrim kompjuterik” e kryer në bashkëpunim, në formën e posaçme të bashkëpunimit të grupit të strukturuar kriminal, “Grupi i strukturuar kriminal” dhe “Kryerja e veprave penale nga organizata kriminale ose grupi i strukturuar kriminal”
Sipas SPAK, në përfundim të hetimit pasuror ka reuzultuar se pasuritë e sekuestruara janë të pajustifikuara nga burime të ligjshme dhe prezumohet se janë rezultat i veprimtarisë kriminale. Vlera e pasurive të sekuestruara për të cilat kërkohet konfiskimi është rreth 1.9 milionë euro dhe 33 milionë lekë.
Prokuroria kërkon konfiskimin e pasurive në emër të Erjon Kasmit, konkretisht të pesë apartamenteve me sipërfaqe totale rreth 480 m2; një vile tre katëshe në Selitë të Tiranës; njësi me sipërfaqe 167 m2 në Rrugën e Kavajës, në kryeqytet; dy garazhe; katër ngastra toke pemtore me sipërfaqe totale 3100 m2 në Borsht ë Sarandës; si dhe subjektin tregtar “Wood Land”, sh.p.k.. Po ashtu janë sekuestruar dhe dy garazhe në pronësi të një personi të lidhur, i cili rezulton të jeë bashkëpronar në disa prej pasurive të regjistruara dhe ne emër të Kasmit.
Gjykatës i kërkohet të vendosë konfiskim dhe mbi pasuritë e Xhujan Xhafës, të tre apartamenteve në Tiranë me sipërfaqe totale rreth 240 m2, si dhe një garazhi.
SPAK kërkon edhe konfiskimin e shumave të sekuestruara, rreth 588 mijë eurove dhe 19.7 milionë lekëve. Sipas prokurorisë, vlera e pasurive të Kasmit është në masën 1.1 milionë euro dhe 13.3 milionë lekë, ndërsa ajo e Xhafës, 240 mijë euro.
Nga hetimet e filluara në vitin 2021 ka rezultuar se shtetas gjermanë, francezë, italianë, spanjollë dhe grekë ftoheshin nga agjentët e subjektit Bluenergycall sh.p.k., shoqëri me lidhje me Kasmin dhe Xhafën, që të investonin në bursa ndërkombëtare, duke bërë depozitimin e parave sipas udhëzimeve të agjentëve, në platformat mashtruese. Këto depozita nga viktimat bëheshin në llogari të cilat kanë rezultuar se gjenden në banka të vendeve të ndryshme si në Bullgari, Lituani, Poloni e Qipro, ku më pas zhdukeshin nëpërmjet transfertave të njëpasnjëshme ose konvertimit në kriptovalutë. Sipas prokurorisë, është provuar se një pjesë e parave të depozitave të viktimave kanë përfunduar në llogaritë e të pandehurve në Shqipëri.
Në korrik të vitit të kaluar, Gjykata e Posaçme e Shkallës së Parë deklaroi fajtor të pandehurin Erjon Kasmi të akuzuar si organizator të kësaj skeme, duke e dënuar përfundimisht në aplikim të gjykimit të shkurtuar me masën 7 vjet e 4 muaj burgim. Bashkëpunëtori i tij, Xhulian Xhafa u dënua me 6 vjet e 8 muaj heqje lirie. Ndërsa 11 operatorët e call centër, ndryshe nga sa kërkoi prokuroria, u deklaruan të pafajshëm. Pak ditë më parë, Gjykata e Posaçme e Apelit vendosi ta kthejë çështjen për rigjykim në shkallën e parë.
