Prokuroria e Përgjithshme shpërndau për mediat të mërkurën më 14 maj informacion përmbledhës për kallëzimet, procedimet penale dhe arrestimet e kryera gjatë javëve të fundit në lidhje me krimet zgjedhor. Në njoftim thuhet se deri të hënën, në prokuroritë e juridiksionit të përgjithshëm janë depozituar gjithsej 87 kallëzime, prej të cilave 49 nga policia gjyqësore, 15 raste nga ana e SPAK, nga subjektet politike janë referuar 9 raste, qytetarët kanë kryer tre kallëzime dhe 11 çështje janë regjistruar kryesisht nga prokuroritë, bazuar dhe në informacionet e konstatuara në burimet e hapura. Bazuar në këto materiale kallëzuese e referuese, është vendosur të regjistrohen 34 procedime penale, prej nga është konkluduar me arrestimin e 7 personave përgjegjës.
Në Prokurorinë e Fierit janë regjistruar 5 procedime penale; në Elbasan 8 çështje; 4 çështje janë filluar në Tirajnë; në Gjirokastër dhe në Lezhë nga 3 procedime; në secilën prej prokurorive të Dibrës, Shkodrës, Sarandës dhe Korçës janë regjistruar nga 2 procedime penale dhe në Durrës, Kukës e Vlorë është regjistruar nga 1 procedim penal në secilën prej prokurorive të këtyre rretheve.
Nga 7 personat e arrestuar, 4 janë nën hetim nga Prokuroria e Tiranës, ndërsa tre ndalimet e tjera janë urdhëruar nga prokuroritë e Elbasanit, Lezhës dhe Fierit. Gjashtë kallëzime penale janë dërguar për kompetencë në SPAK.
