Gjykata Themelore e Prishtinës dënoi të hënën ish-kryeministrin Agim Çeku dhe nëntë të tjerë me nga një vit burg secili, duke përmbysur një vendim të vitit 2021 që liroi nga akuzat të 11 të pandehurit për shpërdorim detyre në falsifikimin e një liste të veteranëve të luftës së Ushtrisë Çlirimtare të Kosovës, UÇK.
Përveç Çekut, nëntë të dënuarit e tjerë janë Sadik Halitjaha, Shkumbin Demaliaj, Qele Gashi, Shukri Buja, Ahmet Daku, Rrustem Berisha, Faik Fazliu, Fadil Shurdhaj dhe Xhavit Jashari. Nuredin Lushtaku dhe Smajl Elezaj u liruan nga akuzat për mungesë provash.
“Vendimi do të ekzekutohet 15 ditë pasi të marrë formë të prerë”, tha gjyqtari Gazmend Bahtiri, duke njoftuar vendimin, i cili mund të apelohet.
Prokuroria Speciale e Kosovës ngriti padi ndaj burrave në vitin 2018, mes pretendimeve se mijëra njerëz që nuk luftuan kurrë në luftën e viteve 1990 ishin regjistruar në mënyrë të rreme si ish-luftëtarë.
Në një vendim të shkurtit 2021, Gjykata Themelore e Prishtinës i liroi të gjithë të pandehurit nga akuzat, duke vënë në dukje se “prokuroria nuk ka arritur ta bindë gjykatën në asnjë formë”. Por në shkurt 2022, Gjykata e Apelit urdhëroi një rigjykim, duke gjetur se vendimi i shkallës së parë përmbante “shkelje thelbësore”.
Sipas aktakuzës, të pandehurit përdorën pozicionet e tyre zyrtare për të përfituar në mënyrë të paligjshme të të tjerëve, duke i kushtuar buxhetit të shtetit mbi 88 milionë euro.
Një komision qeveritar për verifikimin e veteranëve, i ngritur në vitin 2012, në vitin 2016 nxori një listë me 46,000 emra. Në shtator 2017, Prokuroria Speciale njoftoi se hetimet fillestare kishin zbuluar se dhjetëra milionë euro në përfitime po paguheshin në mënyrë të paligjshme.
Aktakuza në këtë rast u përgatit nga Prokurori Special Elez Blakaj, i cili dha dorëheqjen në gusht 2018, duke deklaruar se ai ishte kërcënuar nga “njerëz të njohur dhe të panjohur” që donin që ai të hiqte dorë nga hetimi.
Një numër të dyshuarish të tjerë janë dënuar për falsifikim dokumentesh në gjyqe të ndara në të gjithë Kosovën. Në tetor 2019, Gjykata Themelore në Pejë urdhëroi tre individë të kthenin paratë që kishin marrë në mënyrë mashtruese pasi kishin falsifikuar statusin e veteranit.
Shtatë të pandehur janë gjithashtu në pritje të gjyqit pasi u ngritën padi nga prokuroria në Mitrovicë me akuzën e falsifikimit të dokumenteve.
Në janar 2020, Prokuroria Speciale njoftoi se mbi 8,000 kërkesa ishin dërguar për hetim vetëm në prokurorinë e Pejës.
