Gjendja e vështirë e televizionit publik shqiptar të mbingarkuar me borxhe është rikthyer këtë javë në qendër të vëmendjes, mes pretendimeve se ai nuk u ka kryer pagesat disa bashkëpunëtorëve.
Të hënën, Kozeta Kurti reagoi në Facebook për të shprehur zhgënjimin e saj me Radio-Televizionin Shqiptar, RTSH.
Kurti, autore dhe moderatore e emisionit televiziv “Ditari i një artisti” në RTSH, tha se ajo dhe stafi i saj nuk janë paguar për punën si bashkëpunëtorë të jashtëm dhe nuk kanë marrë asnjë shpjegim për këtë.
“Më vonë nuk lashë vend pa trokitur; në zyrën juridike, në zyrën e financës, në zyrën e drejtoreshës së njësisë së programeve, kërkova takim me Drejtoreshën e Përgjithshme (ndoshta më lehtë hyn në Shtëpinë e Bardhë, se tek zyra e Vasilit) shkrova një email të gjatë”, shkroi Kurti në postimin e saj.
Në prill, Vasili mori detyrën si drejtoreshë e përgjithshme e RTSH që ndodhej në gjendje të rëndë financiare dhe i ngarkuar me procese gjyqësore të lidhura me pushimin e papritur nga puna të rreth 150 punonjësve nga paraardhësi i saj, ish-politikani Alfred Peza.
Ashtu si Kurti, edhe gazetarja Elsa Demo tha të hënën se edhe asaj i detyrohen para dhe se është lënë në terr për fatin e emisionit të saj të artit dhe kulturës, “Artes”.
“Sot duhej të isha në transmetim”, shkroi Demo në një opinion për Reporter.al të BIRN Albania, duke shtuar se kishte kërkuar dy herë takim me Vasilin, por ishte refuzuar. “As stafi i saj nuk ka kthyer përgjigje”, shtoi Demo.
Sipas anëtarëve të Bordit Drejtues të RTSH-së, transmetuesi ka gjashtë milionë euro borxh dhe çështjet gjyqësore për pushimet e padrejta nga puna gjatë mandatit të Pezës i kanë kushtuar deri tani 1.8 milionë euro.
BIRN kërkoi një koment nga Eni Vasili dhe paraqiti një kërkesë zyrtare për të drejtë informimi, por deri në momentin e publikimit nuk mori përgjigje.
Teorikisht, RTSH është politikisht i pavarur, por Bordi Drejtues zgjidhet nga parlamenti, i cili kontrollohet nga Partia Socialiste në pushtet, ndërsa Drejtori i Përgjithshëm zgjidhet nga bordi. Peza ishte ish-deputet i Partisë Socialiste.
Pasi mori detyrën në prill, Vasili, vetë gazetare, tha në një takim të korrikut me organizatat mediatike se stafi i transmetuesit publik “duhet të trajtohet me më shumë dinjitet” dhe se RTSH duhet të “rikthehet në rolin e tij historik si një shkollë mediatike që formëson dhe përgatit breza të rinj”.
Megjithatë, disa bashkëpunëtorë të tjerë të transmetuesit publik thanë për BIRN, të cilët folën në kushte anonimiteti, se edhe atyre u detyrohen para.
“Ka pasur vonesa në pagesa për gati një vit, por muajt e fundit ato janë bllokuar plotësisht”, tha njëri prej tyre. “Që nga maji nuk jemi paguar për punën që bëjmë si bashkëpunëtorë. Jemi ankuar, por askush nuk na jep një përgjigje të qartë.”
Një tjetër tha se nuk ishte paguar që nga 9 qershori dhe se i ishte thënë që transmetuesi po kalonte nëpër “reforma të thella”.
“Kanë kaluar tre muaj pa pagesa,”, tha gazetarja për BIRN. “Na është thënë se do të paguhemi, por ama jo se kur.”
