Organizatat e shoqërisë civile kanë mbështetur fuqishëm implementimin e projektligjit “Për barazi gjinore në Shqipëri”, dhe në veçanti përdorimin e termit “gjini” në vend të termave klasikë “burrë-grua”.
Aktivistët në mbrojtje të të drejtave të njeriut e konsiderojnë këtë projektligj një hap të domosdoshëm drejt standardeve evropiane, duke e quajtur atë një instrument kundër diskriminimit dhe stereotipeve.
“Përdorimi i termit ‘gjini’ është i përafruar me acquis të Bashkimit Evropian, me Konventën për Eliminimin e të Gjitha Formave të Diskriminimit ndaj Grave (CEDAW) dhe me Konventën e Stambollit, duke garantuar që Shqipëria ecën krah për krah me vendet më progresive evropiane”, shprehet qendra “Aleanca Gjinore për Zhvillim”.
Qëllimi parësor i këtij projektligji është të sigurojë të drejtën e çdo individi për barazi gjinore dhe mbrojtje efektive nga diskriminimi mbi bazë gjinore si në jetën publike ashtu edhe private.
Gjithashtu ai synon të përcaktojë autoritetet përgjegjëse për nxitjen e barazisë gjinore dhe detyrat e tyre për implementimin e kësaj barazie, specifikisht ministrinë përgjegjëse për çështjet e barazisë gjinore, në bashkëpunim edhe me Kuvendin e Shqipërisë, Këshillin e Ministrave, si edhe institucionet e tjera të pavarura në vend.
Ines Leskaj, drejtuese ekzekutive e Rrjetit për Fuqizimin e Gruas në Shqipëri i tha BIRN se ky ligj është një nevojë për vendin tonë dhe shoqërinë.
“Kemi lobuar prej vitesh për këtë ligj për shkak të problematikave që nuk i mbulonte vetëm ligji i dhunës”, tha Leskaj për BIRN.
Gjithsesi, prej disa ditësh në disa media dhe portale online po qarkullojnë narrativa dezinformuese të mbështetura nga aktorë që mbrojnë familjen tradicionale, të cilët e kanë keqinterpretuar kornizën ligjore të kësaj iniciative.
Sipas Leskaj, kjo valë dezinformimi është një narrativë e qëllimshme dhe duhet shmangur. Ajo theksoi se po qarkullojnë narrativa manipuluese që e trajtojnë ligjin sikur po sugjeron gjini të llojeve të ndryshme.
“Duhet bërë e qartë për publikun që kjo është një strategji dezinformimi e qëllimshme. Duhet shpjeguar që ligji synon thjesht përparimin e barazisë gjinore”, shtoi drejtoresha e Rrjetit të Fuqizimit të Gruas.
Edhe Xheni Karaj, aktiviste e të drejtave të njeriut dhe komunitetit LGBTI, thekson se vala e dezinformimit lidhur me këtë projektligj duhet sqaruar.
“Përmbajtja e projektligjit nuk shpik gjini të reja. Koncepti ‘gjini’ e shumëfishtë nuk ekziston në këtë projektligj dhe nuk është një koncept ligjor”, shkruan Karaj në reagimin e saj zyrtar.
“Përkufizimi i gjinisë synon vetëm të mbrojë qytetarët nga diskriminimi mbi baza gjinore, pavarësisht çdo karakteristike personale të tyre”, përfundoi Karaj.
