Seanca e votimit nuk zgjati më shumë se 25 minuta, ndërsa ishte parashikuar si një seancë maratonë bazuar në praktikën e mëparshme parlamentare ku çdo deputet ka të drejtë të diskutojë 10 minuta për programin qeverisës.
Në nisje të fjalimit të tij, Rama paralajmëroi opozitën se mazhoranca e re nuk do të ishte më e duruar ndaj protestave të deputetëve të saj në sallën e Kuvendit dhe si kundërpërgjigje do t’I kthente seancat plenare në një procedurë votimi.
“Ndërsa pakicës dua t’i them vetëm se nuk është puna jonë çfarë bëni dhe çfarë thoni jashtë kësaj salle, por në këtë sallë dhe në respekt të zgjedhësve tuaj, do të keni të gjithë vëmendjen tonë dhe të gjithë kohën që të dëshironi nëse do të harroni përdorimin e trupit, të duarve, të këmbëve si argument dhe të zhurmës dhe të rënies me dorë të tavolinave si alternativë. Në të kundërt prania jonë këtu do të zgjasë sa një proces votimi. Mbajeni parasysh këtë!”- iu drejtua ai deputetëve të opozitës.
Dhe kështu ndodhi pak minuta më vonë, kur deputetë të opozitës protestuan nga ulëset e tyre duke e cilësuar antikushtetuese shfaqjen në një ekran të Kuvendit të algoritmit virtual me emrin “Diella”.
Kryetari i Kuvendit, Niko Peleshi u tërhoqi disa herë vëmendjen deputetëve protestues dhe më pas vendosi të hedhë në votim programin qeverisës dhe përbërjen e kabinetit të ri qeveritar, i cili u miratua me 82 vota pro.
“Një akt tipik Kim Yong Un” e cilësoi mbylljen e seancës kryetari i Partisë Demokratike, Sali Berisha duke dalë nga salla e Kuvendit. Sipas tij, ky akt ishte poshtërim i parlamentit.
Ndërsa Toni Gogu, ministër shteti në qeverinë e re, akuzoi opozitën se kishte kanosur kryeministrin.
“Nëse kolegët tanë vijmë me forcën e muskujve dhe i kanosen kryeministrit dhe kabinetit, ne nuk do të jemi as të pranishëm,” tha ai për mediat pas seancës së shkurtër.
PS ka fituar zgjedhjet në 11 maj për herë të katërt që nga 2013 me shumicën më të lartë të mandateve 83 në total, një shumicë pothuaj cilësore që i mjafton për të votuar çdo ligj, madje dhe për të ndryshuar Kushtetutën, që Rama e ka shpallur si objektiv.
