Qindra mbështetës të luftës së Ushtrisë Çlirimtare të Kosovës kundër forcave serbe u mblodhën të premten në kryeqytetin shqiptar, Tiranë, për të protestuar kundër gjyqit për krime lufte ndaj ish-presidentit të Kosovës, Hashim Thaçi, dhe tre ish-zyrtarëve të tjerë të UÇK-së në Hagë.
Duke u mbledhur në sheshin kryesor “Skënderbej”, protestuesit mbanin pankarta me slogane si “Nuk do të lejojmë që historia të rishkruhet në Hagë”, “Liri për çlirimtarët”, “Gjykata Speciale nuk është drejtësi, por tradhti ndërkombëtare”.
Një nga protestuesit, 67-vjeçari Raif Aliu, tha se kishte udhëtuar nga Tetova e Maqedonisë së Veriut për t’iu bashkuar protestës. “Erdha këtu sepse ata janë të pafajshëm”, tha Aliu. “Më vjen shumë keq për ta,” shtoi ai.
Hysni Gucati, kreu i Organizatës së Veteranëve të Luftës së UÇK-së, i tha turmës se, duke gjykuar Thaçin dhe të akuzuarit e tjerë me të Kadri Veseli, Rexhep Selimi dhe Jakup Krasniqi, Gjykata Speciale “po përpiqet të barazojë viktimën me xhelatin”.
“Ne jemi këtu për të mbrojtur luftën e shenjtë (kundër forcave serbe)… E gjithë bota ka parë krimet serbe (të luftës)”, tha Gucati.
“Sot Tirana është kryeqyteti i të gjithë shqiptarëve dhe sot po i themi botës mbarë se Kosova luftoi për lirinë e saj”, shtoi ai.
Kjo është protesta e tretë e madhe kundër gjyqit të Thaçit në Gjykatën Speciale të Kosovës gjatë muajve të fundit, pas tubimeve në Prishtinë dhe në Hagë, përpara fillimit të fazës së mbrojtjes në shtator.
Kryeministri i Shqipërisë, Edi Rama, tha se do të kishte marrë pjesë në protestën e së premtes, por nuk mundi të ishte i pranishëm sepse rreziku i politizimit “do të dëmtonte qëllimin dhe popullaritetin e saj”.
Komenti i Ramës erdhi pasi protesta në Tiranë ndezi sërish përplasjen e tij me partinë më të madhe në Kosovë, Vetëvendosje, e cila drejtohet nga kryeministri në detyrë, Albin Kurti.
Përplasja nisi kur Vetëvendosje akuzoi figura politike që tani janë kundër gjykatës së Hagës, përfshirë Ramën, se dikur e kishin mbështetur atë.
Rama, i cili ka një marrëdhënie të tensionuar me liderin e Vetëvendosjes, Albin Kurtin, u përgjigj duke thënë se ai ka dënuar në mënyrë të vazhdueshme arrestimin për krime lufte të ish-presidentit të Kosovës, Hashim Thaçi.
Rama shtoi se një dekadë më parë, kur u krijua gjykata e Hagës, Vetëvendosja “s’e njihte as himnin (kombëtar) të Kosovës, e jo më pafajësinë e Hashim Thaçit, të cilin do ta donte përjetësisht në Hagë”. Thaçi dikur ishte lider i një partie rivale të Vetëvendosjes, Partisë Demokratike të Kosovës (PDK).
Thaçi u akuzua në tetor të vitit 2020 dhe dha dorëheqjen nga posti i presidentit të Kosovës për t’u përballur me akuzat. Ai u dërgua në Hagë për t’u gjykuar bashkë me ish-kryetarët e Kuvendit, Jakup Krasniqi dhe Kadri Veseli, si dhe ish-deputetin Rexhep Selimi — të gjithë figura të larta të UÇK-së gjatë luftës.
Të katërt janë akuzuar për krime lufte dhe krime kundër njerëzimit gjatë luftës së Kosovës, përfshirë vrasjet e rreth 100 personave. Ata të gjithë janë vetëdeklaruar të pafajshëm.
Dhomat e Specializuara të Kosovës janë pjesë e sistemit të drejtësisë së Kosovës, por ndodhen në Hagë dhe përbëhen nga staf ndërkombëtar për të garantuar një proces të drejtë pas problemeve me kanosjen e dëshmitarëve në çështjet e mëparshme që lidhen me UÇK-në.
Shumë shqiptarë etnikë dhe mbështetës të UÇK-së këmbëngulin se gjykata është e njëanshme, pasi ndjek penalisht vetëm luftëtarët e Kosovës, ndërsa shumë krime të forcave serbe mbeten të pandëshkuara. Pavarësisht dallimeve politike, shumica e partive në Kosovë mbështetën protestën e së premtes.
