Një portofol i gjerë pasurish të paluajtshme, përfshirë një pikë karburanti, magazina, troje dhe një njësi betoni, me vlerë totale rreth 3 milionë euro, u konfiskua me vendimin e Gjykatës së Gjirokastrës, pasi dyshohet se rrjedh nga burime të paligjshme.
Prokuroria e Gjirokastrës njoftoi se konfiskimi u vendos me kërkesë të saj për pasuritë që ajo identifikoi se i përkisnin një personi me inicialet D.A. BIRN konfirmoi se pasuritë ishin të Drini Alikos dhe se hetimet për këto asete kishin nisur në vitin 2019.
“Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm, Gjirokastër, u konfiskuan tre milionë euro pasuri të shtetasit D.A., i cili nga hetimet rezultoi se nuk ka burime të ligjshme për krijimin e pasurive”, njoftoi prokuroria.
Sipas njoftimit zyrtar të organit të akuzës, pasuritë ndodhen kryesisht në zonat e Kordhocës, Lazaratit dhe Grehotit. Konfiskimi është bërë në zbatim të ligjit antimafia, i cili synon parandalimin dhe goditjen e krimit të organizuar dhe korrupsionit përmes masave parandaluese kundër pasurisë.
Pjesa më e madhe e aseteve janë objekte tregtare dhe industriale në Kordhocë, përfshirë një pikë karburanti, tre magazina me sipërfaqe rreth 1 mijë metra katrorë, një nyje prodhimi betoni, një nyje përpunimi inertesh, një ndërtesë dy katëshe për zyra dhe një lokal.
Po ashtu janë konfiskuar 3,800 metra katrorë tokë truall në Kordhocë, Grehot, Lazarat dhe në Gjirokastër, si edhe banesa në Lazarat dhe toka me sipërfaqe 600 metra dhe 700 metra katrorë në fshatin Arshi Lengo.
Drini Aliko është dënuar për moskallëzim krimi në vitin 2016, si pjesë e një grupi kriminal të drejtuar nga Gate Mahmutaj, i cili akuzohej për sulm me armë ndaj Policisë së Shtetit gjatë një operacioni në vitin 2004. Aliko kishte gjithashtu precedentë të tjerë penalë dhe ishte proceduar, pa u dënuar, për kultivim dhe trafikim narkotikësh; këto, sipas gjykatës, e bënin atë subjekt të ligjit antimafia.
