Hetimet e para pas arratisjes të martën, 13 janar, nga Spitali Rajonal i Durrësit, së Altin Ndocit, kanë gjetur shkelje të rregullores së shoqërimit dhe normat e sigurisë së oficerëve përgjegjës të Policisë së Burgjeve. Në lidhje me ngjarjen janë ndaluar 8 persona, përfshirë drejtues dhe punonjës të sigurisë së burgut, të cilët akuzohen për shpërdorim detyre dhe shkelje të rregullores gjatë shoqërimit të Ndocit.
Në një njoftim për shtyp, Drejtoria e Përgjithshme e Burgjeve bëri me dije se në rastin e Ndocit nuk ishte ndjekur protokolli dhe ishin gjetur disa shkelje, përfshi dështimi për të vënë në dijeni policinë.
“Nga verifikimet paraprake rezulton se, për shoqërimin e planifikuar, IEVP Durrës nuk ka informuar Drejtorinë e Përgjithshme të Burgjeve dhe Komisariatin e Policisë Durrës, si dhe nuk ka raportuar në Drejtorinë e Përgjithshme të Burgjeve as planifikimin dhe as realizimin e vizitës mjekësore, në kundërshtim me aktet nënligjore në fuqi. Gjithashtu, rezulton se nuk janë respektuar procedurat standarde për shoqërimin e të paraburgosurve dhe të dënuarve”, thuhet në një reagim të Drejtorisë së Përgjithshme të Burgjeve.
DPB po ashtu njoftoi pezullimin e të gjithë zinxhirit komandues të burgut të Durrësit për t’i hapur rrugë hetimit. Sipas njoftimit janë pezulluar drejtori Indrit Cerloj, shefi i policisë Afrim Zeqiraj, shefi i komanduar i policisë për IEVP Durrës Dezdemon Pazaj, mjekja Ylfete Sema, shefe e Shërbimit të Kujdesit Shëndetësor në IEVP, kryeinfermieri Aulon Quku dhe 7 oficerë të policisë së burgjeve.
Ndërkohë Shërbimi i Kontrollit të Brendshëm dhe prokuroria kanë urdhëruar ndalimin e 8 personave. Mes të arrestuarve është Desdemon Pazaj, zëvendës shefi i komanduar i policisë së burgut, Aulon Çuko, kryeinfermier dhe policët e shoqërimit Dorjan Saraçi, Sal Ferollari, Preng Marvataj, Aranit Çela, Violeta Uka. Po ashtu nën arrest është edhe Fatjon Baçi, efektiv i policisë së burgjeve, i marrë më parë i pandehur nga SPAK për një rast tjetër, ku akuzohet se i ka dhënë telefonin Erion Veliajt gjatë transportit për në GJKKO.
Drejtoria e Përgjithshme e Burgjeve thotë se Ndoci përdori dhunë për t’i ikur oficerit të policisë që e shoqëronte.
DPB bën me dije se pas kontrolleve në spital, Ndocit i është kërkuar të qëndronte në pritje dhe ka kërkuar të shkojë në tualet, por në këtë moment ka sulmuar oficerin e policisë që e shoqëronte dhe është larguar. “Ai është shoqëruar nga punonjësit e Policisë së Burgjeve, por gjatë këtij momenti ka kundërshtuar dhe goditur punonjësit, duke arritur të arratiset”, njoftoi DPB.
Pamjet nga kamerat e sigurisë të publikuara në media kanë zbardhur dinamikën e arratisjes, duke evidentuar në dukje shkelje të protokollit të sigurisë. Në pamjet filmike, Ndoci shihet duke zbritur nga ambulanca i lirë dhe pa pranga, pavarësisht se klasifikohet si person me rrezikshmëri të lartë.
Pamjet e Ndocit duke vrapuar po ashtu shihen në kamera. Policia dyshon se atë e priste një automjet tip “Audi A7”, me të cilin është larguar duke ndjekur itinerarin Spitallë – Shënavlash – Autostradë, me destinacion të dyshuar Tiranën.
Ndërkohë mësohet se forca të shumta policie kanë nisur kontrolle intensive në Tiranë, pas dyshimeve se i akuzuari për vrasje dhe pjesëmarrje në organizatë kriminale Altin Ndoci, i arratisur mesditën e djeshme, 13 janar, nga Spitali Rajonal i Durrësit, fshihet në Tiranë.
Altin Ndoci, i arrestuar që prej vitit 2020, është dërguar për gjykim nga SPAK si pjesë e organizatës kriminale të vëllezërve Çopja dhe akuzohet për disa vrasje, bazuar edhe në dëshmitë e të penduarve të drejtësisë.
