Paraditen e së mërkurës, në një takim të organizuar nga Rrjeti i Profesionistëve të Rinj, me mbështetjen e organizatës suedeze “Olaf Palme International”, u prezantuan gjetjet e pyetësorit për të Drejtat në Punë të punonjësve të organizatave të shoqërisë civile, me qëllim adresimin e sfidave të sektorit.
Sipas ekspertëve të të drejtave në punë, organizatat e shoqërisë civile po përballen me sfida të mëdha: kufizimin e burimeve financiare dhe paqëndrueshmërinë që vjen si pasojë e tij.
Inva Çela, eksperte për të drejtat në punë, tha se sfidat kryesore konsistojnë në pagat e ulëta, pasigurinë në punë, stresin dhe presionin e afateve të projekteve.
“77% e punonjësve ndihen të mbingarkuar, teksa shumica e OSHC-ve kanë mungesë burimesh njerëzore”, citoi ekspertja nga gjetjet e anketimit të kryer me punonjësit e sektorit.
Tkurrja e financimeve nga donatorët gjatë viteve të fundit luan gjithashtu rol në rritjen e pasigurisë, teksa kostot operacionale të organizatave janë rritur.
“Vetëm 33% e punonjësve kanë kontrata pune me afat të pacaktuar, teksa 58% e kanë kontratën me afat të caktuar”, tha Çela.
Gjetjet e anketimit tregojnë më tej se paga e punonjësve të sektorit varion nga 40 mijë deri në 80 mijë lekë, duke u konsideruar relativisht e ulët nga vetë punëmarrësit.
“Si rrjedhojë, ky sektor karakterizohet nga pasiguri ekonomike dhe mungesë perspektive”, tha ekspertja Çela.
Një tjetër gjetje e anketës tregon se puna në shumicën e OSHC-ve është në funksion të projekteve, gjë që ndikon në sigurinë ekonomike.
“Afatet e ngushta të projekteve, nga ana tjetër, ndikojnë në gjendjen psikologjike të punonjësve”, shtoi ekspertja e të drejtave në punë.
“Vetëm 23% e shohin veten në të njëjtin pozicion pas 5 viteve, një e dhënë që tregon se ky është një rrezik serioz për qëndrueshmërinë e sektorit”, përfundoi ajo.
