Gjykata e Posaçme e Shkallës së Parë shpalli të enjten me 21 maj vendimin për deklarimin fajtore të ish-kryetares së komanduar të Bashkisë Tropojë, Zyra Islamaj, e akuzuar për korrupsion pasiv, pasi u përpoq që përmes një tenderi të hapur të favorizonte ndërtimin e një ure në dobi të familjarëve të saj. Gjykata vendosi dënimin e Islamajt me 2 vjet e 1 muaj burgim, por e pezulloi ekzekutimin e masës ndëshkuese duke e konvertuar në 2 vjet shërbim prove, me kusht që të mos kryejë tjetër vepër penale. Po ashtu, e vendos dhe dënimi plotësues që i ndalon Islamajt të ushtrojë funksione publike për një periudhë 5-vjeçare.
Trupi gjykues i kryesuar nga gjyqtarja Flojera Davidhi, deklaroi fajtor edhe ndërtuesin Rrok Gegaj për veprën penale korrupsioni aktiv. Ndaj tij u caktua dënimi me 6 muaj burg, por edhe në këtë rast u pezullua dhe u zëvendësua me 1 vit shërbim prove.
SPAK kërkoi dënimin e Islamajt me 3 vjet burg dhe konvertimin e masës së dënimit me 4 vjet shërbim prove. Për të pandehurin Gegaj u kërkua dënimi me 1 vit heqje lirie dhe zëvendësimi me 2 vjet shërbim prove. Të pandehurit u deklaruan të pafajshëm. Megjithatë, ata kërkuan që nëse do të gjendeshin fajtorë prej gjykatës, të zëvendësohej masa e dënimit me orë punë me interes publik.
Nga hetimi i SPAK u konkludua se e pandehura Zyra Islamaj, kur ushtronte funksionin e kryetares së Bashkisë së Tropojës, ka ndërhyrë tek ndërtuesi, Rrok Gega për të ngritur urën mbi përroin që kalon pranë shtëpisë së motrës së saj. Njëkohësisht planifikoi të angazhonte edhe teknikun e mirëmbajtjes së rrugëve, punonjës në Bashkinë Tropojë, për ta ndihmuar ndërtuesin. Sipas SPAK, ndërtuesi ka pohuar gjatë hetimit paraprak se ky ndërtim nuk ka qenë në procedurat e tenderimit dhe se ai do t’ia bënte dhuratë Islamajt. Çështja u regjistrua bazuar në një kallëzim të kryer nga Partia Demokratike.
